निओ फ्युजनया १३ क्वःगु बाजं प्रशिक्षण क्वचाल

ख्वप(नेपालभाषा टाइम्स)/ निओ फ्युजन स्कुल अफ कम्प्युटरया ग्वसालय् न्ह्यानाच्वंगु बाजं प्रशिक्षण क्वचाःगु दु । निओ फ्युजनया ग्वसालय् न्ह्यानाच्वगु १३ क्वःगु निओ फ्युजन बाजं पुचःया प्रशिक्षण वंगु वालय् क्वचाःगु खः ।
कला, संस्ृकति, परम्परा, रीतिरिवाज, नखःचखःलिसें मूर्त अमूर्त सम्पदाया कारणं विश्वय् बिस्कंकथं म्हसीका वयाच्वंगु ख्वप देय्यात संस्थां संगीतमय रुपय् नं म्हसीका बीगु उद्देश्यं निःशुल्क रुपं उकथं थीथी बाजंया प्रशिक्षण बिया वयाच्वंगु दु ।
निओ फ्युजन स्कुल अफ कम्प्युटरका निर्देशक बालकृष्ण बनमालां ल्याय्‌म्ह व मस्तय्‌त थःपिनिगु म्हसीका ल्यंकेगु नापं सांस्कृतिक बाजंया संरक्षण, प्रवद्र्धन यायेगु ल्याखं थुकथं प्रशिक्षण बियाः न्ह्याः वनाच्वनागु खँ कनादीगु दु । ल्याय्‌म्ह पुस्ता व मस्तय्‌त लक्षित थीथी सीपमूलक तालिम बीगुया नापनापं निःशुल्क रुपं थीथी गतिविधिइ क्रियाशील यायेगु ज्यां इमिके थःगु जाति, भाषा, कला, संस्कृतिलिसें देय्‌प्रति माया मतिना ब्वलनीगु व संस्कृतिप्रति नं लगाव अप्वया वनीगु वय्‌कलं कनादिल ।
बाजं समूहया अध्यक्ष सविन लेवां न्हू पुस्ताया ल्याय्‌म्ह व मस्तय्‌त थुकथं बाजं प्रशिक्षण बिया वयाच्वनागु झ्वलय् लिपांगु इलय् गैर नेवाःतय्‌सं नं तसकं अभिरुचिपूवर्क व ध्यान बियाः सयेकाच्वंगु खँ कनादिल । वंगु छगू दशक न्ह्यवंनिसें थम्हं सःगु बाजं प्रशिक्षण बिया वयाच्वंगु व थुगुसीया प्रशिक्षणय् झिंन्हय्‌म्ह गैर नेवाःतय् सहभागिता दुगु वय्‌कलं कनादिल ।
वंगु छगू दशकनिसें निरन्तर रुपं बाजं प्रशिक्षणया कारणं छगूकथं लगाव अप्वया वःगु प्रशिक्षण उगेन बोय्‌जुं कनादिल । संस्थापाखें आतक धिमे बाजं खुक्वः, धाः बाजं प्यक्वः, बासुरि स्वक्वः व पछिमा निक्वःतक प्रशिक्षण बीधुकूगु दु ।