मतया तार भूमिगत यायेगु ज्या बेवारिस

येँ (रासस)- स्वनिगलय् मत (विद्युतीय)या तार भूमिगत यायेगु ज्या प्रभावकारी जुइ फयाच्वंगु मदु । नेपाल विद्युत प्राधिकरण व सडक विभाग दथुइ समन्वय जुइमफुगुलिं थ्व ज्या प्रभावकारी जुइ मफयाच्वंगु खः ।

प्राधिकरणया कार्यकारी निर्देशक कुलमान घिसिङं सडक विभागं सतक म्हुइत अनुमति मबिउगुलिं स्वनिगःया विद्युत वितरण प्रणाली (तार)यात भूमिगत दयेकेगु ज्या बेवारिस जुयाच्वंगु दावी यानादीगु दु । वय्कलं सरकारी निकाय दथुइ समन्वय मजूगु कारणं तःधंगु व महत्वपूर्ण आयोजना हे बेवारिस जूवनीगु तसकं दुर्भाग्यपूर्ण जूगु खँ धयादीगु दु ।

सडक विभागं थःगु अधिनय् दुगु सतक म्हुइत अनुमति मबिउगुलिं विद्युत वितरण प्रणाली भूमिगत यायेगु आयोजनाया ज्या वंगु असार निसें ठप्प जुयाच्वंगु दु । यल महानगरपालिका व प्राधिकरणया साझेदारीइ जडान याःगु स्मार्ट सतक मत उलेज्याया निंतिं बिहिवाः यलय् जूगु ज्याझ्वलय् न्ववानादिसें प्राधिकरणया कार्यकारि निर्देशक घिसिङ तार भूमिगत यायेगु ज्याय् संलग्न निर्माण व्यवसायीत ज्या त्वःताः वनेधुंकूगु खँ कनादिल । थज्याःगु अवस्थाय् आयोजना कार्यान्वयन जुयाच्वंगु पालिकाया जनप्रतिनिधितय्सं सडक विभागलिसे समन्वय यानाबिउसा अझ नं छुं ई दनिगु खँ न्ह्यथँसें वय्कलं सकलें जिम्मेवार जुयाः ज्या यायेमाःगु खँय् बः बियादिल । वय्कलं सतकया पेटीइ ज्या यायेत पालिकां अनुमति बिउसां सडक विभागं ज्या याकेमबिउगु खँ कनादिल ।

‘जमिन च्वय् (ओभरहेड) स्वयां तारयात भूमिगत यायेबलय् झिदुगं थिके जुइ । तार भूमिगत यायेत सतक म्हुइबलय् दुने छु छु लुइ, तसकं थाकु । छुं ईया निंतिं मछिंसां समन्वय यानाः ज्या याये धाःसा सडक विभागपाखें स्वीकृति वइमखु, बर्खाजःछि वय्कःपिंसं अनुमति मबिल, तर बर्खा क्वचायेधुंकाः नं आःतक अनुमति मबिउनि’ वय्कलं धयादिल ।

प्राधिकरणं स्वनिगःया विद्युत वितरण प्रणालीयात भूमिगत, सुदृढीकरण व स्वचालित यायेगु निंतिं न्हापांगु चरणय् येँया रत्नपार्क व महाराजगञ्ज वितरण केन्द्रअन्तर्गत लाःगु क्षेत्रय् ज्या सुरु याःगु खः ।

निगूगु चरणय् येँया ल्यंदुगु थाय्, स्वंगूगु चरणय् यलया व ख्वपया सहरी क्षेत्र व प्यंगू चरणय् पोखरा व भरतपुर महानगरपालिका अन्तर्गतया क्षेत्रय् वितरण प्रणालीयात भूमिगत, सुदृढीकरण व स्वचालित यायेगु ज्या न्ह्याकूगु खः ।

थ्व अन्तर्गत ३३ व ११ हजार भोल्टेज व ४०० भोल्टेजया भूमिगतलाइन निर्माणया लिसें अप्टिकल फाइबर नं लानायंकूगु खः । थुकिं विद्युत, टेलिफोन, इन्टरनेट सेवा प्रदायकया घालमुलः जुयाच्वंगु तारं कुरुप जुयाच्वंगु सहरया कुरुपता अन्त्य जुयाः सहरया सौन्दर्यता खनेदइगु आशा यानातःगु खः ।

कार्यकारी निर्देशक घिसिङं विकास जुइगु ज्याय् आमसर्वसाधारणं थुकियात सहज रुपं कयाः छुं ई मछिंसां सह यायेमाःगु खँ धयादिल । ‘भतिचा मछिं थें जुलकि वडां ब्वः बीगु, नगरपालिकां ब्वःबीगु, गुगुं थासय् सडक विभागं ज्या हे याके मबीगु, सहमति मकासे ज्या यात धाःसा जिमि कर्मचारीतय्त कुनाबी’ वय्कलं धयादिल, ‘यक्व पहल यानाः नं सडक विभागपाखें सहमति मवःगुलिं थः हे सडकय् दनाः ज्या याके धाःसां ठेकेदारतय्सं सहमति मवयेकं जिमिसं ज्या यायेफइमखु धकाः अडान काइ । जिं चाहे जुयां नं ज्या याकेफुगु अवस्था मदु ।’

थौंकन्हय् जुयाच्वंगु ओभरहेड वितरण प्रणाली स्वयां भूमिगत प्रणाली सुरक्षित जुइगु व सहरयात कुरुप दयेकातःगु घालःमुलः तारया जाः चिलावनाः सौन्दर्य कायम यायेफइ । भूमिगत ज्या यायेबलय् सतकय् म्हो जक क्षति जुइगु प्रविधि छ्यलाच्वंगु दु । सतकय् सवारीसाधन व न्यासि जुइपिंत लिच्वः मलाइकथं चान्हय् जक ज्या यायेगु व्यवस्था यानातःगु दु । सतक म्हुइबलय् नं आमनागरिकतय्त धुलं म्हो जक लिच्वः लाइकथं माःगु व्यवस्था यानातःगु दु । तार भूमिगत यायेबलय् क्षति जूगु सतक दयेकेगु ज्या झिन्हुया दुने यायेगु व्यवस्था यानातःगु दु ।

सडक विभागं ५०प्रतिशत धरौती फ्वन
सडक विभागं तार भूमिगत यायेत म्हुइगु सतक खण्डया अनुमानित लागतया ५० प्रतिशत धरौटी तयेमाःगु प्रस्ताव तःगु दु । थ्वयां न्ह्यः २० प्रतिशत धरौटी कयाः ज्या याका वयाच्वंगु खःसा विभागं आः थुकियात बढे यानाः ५० प्रतिशत तयेमाःगु माग याःगु खः । प्राधिकरणं थःगु ज्या सिधयेकाः सतक अथें त्वःता वन धाःसा सतक दयेकेगु निंतिं धरौती रकमया व्यवस्था याःगु खः । सतक दयेकाबिल धाःसा विभागं उगु ध्यबा लितबी ।

प्राधिकरणया आयोजना व्यवस्थापन निर्देशनालयया उपकार्यकारी निर्देशक ताराप्रसाद प्रधानं थ्व दँय् यायेगु सम्झौताया निंतिं ५० प्रतिशत धरौती तयेमाःगु प्रस्ताव सतक विभागपाखें वःगु खँ कनादीगु दु । ‘नेपाल सरकारं बजेट तयाबिउगु मदु, जिमिके नं मदु, न्हापा न्हापा २० प्रतिशततया वयाच्वनागुलिइ थुगुसी निसें ५० प्रतिशत धरौती तयेमाःगु प्रस्ताव वःगु दु । जिमिसं पुलांगु हे व्यवस्था कथं सम्झौता जुइमाः धकाः धया वयाच्वनागु दु’ उपकार्यकारि निर्देशक प्रधानं धयादिल । खानेपानीलगायतया निकायपाखें स्वीकृति कायेधुंकाः जक सडक विभागपाखें अनुमति बीगु न्हूगु प्रस्ताव नं वःगु दु । ‘थज्याःगु सर्तं झन्झन् मछिंका च्वंगु दु ’ वय्कलं धयादीगु दु ।