नेपाः व पाकिस्तानया बौद्ध स्वापू सम्बन्धी सफू पिदन
येँ (नेपालभाषा टाइम्स)- दक्षिण एशियाली देय् पाकिस्तानयात मुस्लिम राष्ट्रकथं सकस्यां म्हसिउ । तर थ्वहे देशं प्यंगूगु शताब्दीपाखे नेपाः वःम्ह छम्ह बौद्ध भिक्षुया लुमन्तिइ येँया स्वयम्भूइ बौद्ध चैत्य दयेकातःगु दु धइगु खँ धाःसा यक्वस्यां मसिउ । स्वयम्भूया क्वसं मञ्जुश्री वनेगु थासय् दयेकातःगु तग्वःगु चैत्य हे पाकिस्तानी बौद्ध विद्वान पण्डित वसुबन्धुया लुमन्तिइ दयेकातःगु चैत्य खः । नेवाःतय्सं धाःसा उगु चैत्ययात थौंकन्हय् पुलांगु स्वयम्भू धकाः म्हसिउ ।
वर्तमान पाकिस्तानया गान्धारय् सन् ३१६ य् जन्म जूम्ह पण्डित वसुबन्धु थः द्वःछिम्ह शिष्यपिं ज्वनाः नेपाः वःगु जुयाच्वन । स्वयम्भूइ च्वनाः वय्कःपिंसं ध्यान व प्रवचन बीगु ज्या नं याःगु खः । ८० दँया वैंसय् थ्यंकाः वसुबन्धु नेपालय् हे मंत । वयां लिपा वय्कःया हे लुमंतिइ उगु चैत्य दयेकूगु खः ।
वंगु शनिवाः वरिष्ठ परराष्ट्रविद् हिरण्यलाल श्रेष्ठं च्वयादीगु ‘नेपाल–पाकिस्तानबौद्ध सम्बन्ध’ नांगु अंग्रेजी भाय्या सफू वहे चैत्यया क्वसं छगू ज्याझ्वः यासें विमोचन यात ।
ज्याझ्वलय् न्ववासें मूपाहां पुलांम्ह प्रधानमन्त्री लिसें नेकपा (एकीकृत समाजवादी) या वरिष्ठ नेता झलनाथ खनालं भारतीय प्रधानमन्त्री नरेन्द्र मोदीं धाः थें विश्वयात भारतं बुद्ध बिउगु मखु, विश्वयात नेपालं बुद्ध बिउगु खः धयादिल । वय्कलं धयादिल, ‘थौं विश्वय् ल्वाभः न्यानाः खर्च यायेगु ज्याय् शक्ति राष्ट्रतय् दथुइ धेंधेंबल्लाः जुयाच्वन । बुद्धया शिक्षा ग्रहण याःगु जूसा अथे ल्वाभः न्यायेगु ज्याय् खर्च याये माली मखु ।’
नेपाःया लागिं पाकिस्तानी राजदूत अब्रार हाशमीं पाकिस्तानया थीथी थासय् आःतक नं बुद्ध धर्मलिसे सम्बन्धित स्मारकत आपालं दनि धासें थुकिया संरक्षण व संवद्र्धन यायेगु ज्याय् पाकिस्तानी सरकारं माक्व ध्यान बियाच्वंगु दु धयादिल । लिसें वय्कलं निगू देय्या बौद्ध स्वापू क्वातुकेगु लागिं च्वमि हिरण्यलाल श्रेष्ठं बियादीगु सुझावतय्त कार्यान्वयन यायेगु लागिं नं थःपिंसं कुतः यायेगु बचं बियादिल ।
प्रा.डा. त्रिरत्न मानन्धरं नेपाःया शिक्षा प्रणाली विकास यायेगु ज्याय् नं पाकिस्तानया योगदान दु धासें त्रिभुवन विश्वविद्यालयं पाकिस्तानया पंजाब विश्वविद्यालयया प्रणाली हे नेपाःया एमए व एमफिल तगिमय् लागू याःगु खँ कनादिल ।
बौद्ध विद्वान डा. धम्मविजय गुरुमां, डा. गोपाल पोखरेलपिंसं नं थःगु बिचाः तयादीगु ज्याझ्वलय् लामा गुरु, थेरवादी भिक्षु व वज्राचार्य गुर्जुपिंसं पाठ यानाःन्ह्याकूगु उगु ज्याझ्वलय् बौद्ध परम्परा कथं दानप्रदान यायेगु ज्या नं जूगु खः।
LEAVE YOUR COMMENTS