ने. सं. ११४३ चौलाथ्व पारू -

इन्धन डिपो दयेकेगु थाय् लुइकल

येँ – चीन सरकारं दयेकाबी धाःगु इन्धन भण्डारण यायेगु डिपो तयेगु निंतिं सरकारं थाय् लुइकूगु दु । उद्योग, वाणिज्य तथा आपूर्ति मन्त्रालयं जग्गा मालेगु निंतिं दयेकूगु समितिं नुवाकोटया विदुर नगरपालिका ५य् च्वंगु बुनीबेंसीइ जग्गा लुइकूगु खः । मन्त्रालयं जग्गा मालेगु निंतिं उपसचिव लवदेव जोशीया संयोजकत्वय् पेट्रोलियम पदार्थ भण्डारणगृह निर्माण यायेत जग्गा पहिचान कार्यदल धकाः वंगु वैशाख १९ गते समिति दयेकूगु खः ।

कार्यदलं थीथी थासय् जग्गा स्वयेधुंकाः नुवाकोट जिल्ला समन्वय समितिया नामय् दुगु ८९ रोपनी जग्गा डिपो दयेकेत उपयुक्त जूगु ठहर याःगु खः । संयोजक जोशीं धयादीगु दु, ‘गल्छी–रसुवागढी सतकमार्गलिक्क लाःगु, समथर भुभाग, सुरक्षाया दृष्टिकोणं थ्व थाय् उपयुक्त खनेदुगुलिं थुकियात हे ल्ययाः प्रतिवेदनय् दुथ्याकागु दु ।’निदँ न्ह्यव चीन सरकारं नेपालय् स्वंगू ततःधंगु इन्धन भण्डारण डिपो दयेकाबीगु प्रतिबद्धता प्वंकूगु खः ।

आः प्रधानमन्त्री केपी ओलीं चीन भ्रमण याइबलय् कार्यान्वयनया निंतिं एजेन्डा पेश यायेत जग्गा मालेज्या न्ह्याकूगु खः ।
चीन सरकारं ९० न्हुयात गाइकथं इन्धन भण्डारण यायेगु डिपो दयेकाबीगु प्रतिबद्धता प्वंकातःगु खः । चीनं स्वथाय् डिपो दयेकाबीगु खँ धाःगुलिं नुवाकोट, गोरखा, तनहुँ, यल व काभ्रेय् जग्गा मालेगु ज्या न्ह्याकूगु खः ।

थौंकन्हय् नेपाल आयल निगमयाके येँय् ७१ हजार १९८ किलोलिटर इन्धन भण्डारण यायेगु डिपो जक दु । थ्व इन्धन मुक्कं न्हय्न्हुयात जक गाः । भारतं नाकाबन्दी तयेधुंकाः चीन सरकारं स्वलायात गाक्क भण्डार यायेफइगु डिपो दयेका बीफइगु खँ धाःगु खः ।