ने. सं. ११४४ कौलाथ्व पारू - नःलास्वनेगु

लुँया भावय् हानं न्हूगु कीर्तिमान

येँ (नेपालभाषा टाइम्स)-अन्तर्राष्ट्रिय लुँ बजारय् म्हिगः हानं न्हूगु रेकर्ड कायम जुल । म्हिगः नेपाःया बजारय् लुँ तोलां १ लाख २० हजार ८०० थ्यंगु खः । थ्व आः तकया दकलय् थहां वंगु भाः खः । म्हिगः अन्तर्राष्ट्रिय बजारय् लुँ प्रति औंश २०७२ डलर थ्यंगु खः । म्हिगः छक्वलं ३२ डलर थहां वंगु खः ।

नेपाल सुनचाँदी व्यवसायी महासंघया पुलांम्ह अध्यक्ष लिसें बजाः विश्लेषक तेजरत्न शाक्यं कनादीकथं लुँया भाः थहां वंगुया मू कारण अमेरिकी फेडरल बैंक प्रमुख जेरोम पावेलं मुद्रास्फीति २ प्रतिशतय् कायम यायेगु व बैंकं बिया वयाच्वंगु ब्याजदर नं क्वकायेगु धकाः स्टेटमेन्ट जारी याःगुलिं खः ।

उकथं हे थौंकन्हय् अमेरिकी रोजगार बजारय् रोजगार म्हो जूगुलिं नं उकिया लिच्वः लुँइ लाःगु दु । अमेरिकी रोजगार बजारय् रोजगार मदयेवं लगानीकर्तातय्सं लुँइ लगानी याःगुलिं लुँया भाः थहां वंगु खः । ‘नेपालभाषा टाइम्स’ लिसे खँ ल्हासं शाक्यं कनादिल, ‘अमेरिकाय् बेरोजगार अप्वल धाःसां नं लुँया भाः थहां वनेगु याः। रोजगार क्षेत्रय् लगानी याइपिं लगानीकर्ता तय्सं रोजगार क्षेत्रय् लगानी याये मखन कि लुँइ लगानी याइ ।’

वय्कःया कथं यदि अमेरिकाय् रोजगारी बढे जुल धाःसा लुँया भाः हाकनं कुहां वइगु सम्भावना दु । नेपाःया बजारय् वंगु वालंनिसें लुँया भाः थहां कुहां जुयाच्वंगु खःसा म्हिगः छक्वलं भाः थहां वनाः तोलां १ लाख २० हजार ८०० तका थ्यंगु खः । उकथं हे म्हिगः अन्तर्राष्ट्रिय बजारय् वहःया भावं नं न्हूगु रेकर्ड कायम याःगु दु ।