ने. सं. ११४४ कौलाथ्व पारू - नःलास्वनेगु

सहकारीया ब्याजया सीमा पुनरावलोकन यायेत माग

येँ – सरकारी संस्थातय्सं त्यासाय् काइगु ब्याज निक्षेपय् बीगु ब्याजयात कयाः सरकारं क्वःछिनातःगु अधिकतम सीमायात सहकारीतय्सं कार्यान्वयन हे यायेमफइगु खँ धासें थुकियात हिलेमाःगु माग याःगु दु । सहकारीतय्सं अधिकतम ब्याज सीमा हिइकेगु निंतिं पहल नं सुरु यायेधुंकूगु दु ।

सरकारं छुं ई न्ह्यव निक्षेपय् बीगु ब्याज व त्यासाय् काइगु ब्याजदर दथुइ ६ प्रतिशतया अन्तर दयेमाःगु नियम लागू याःगु खः । थ्व व्यवस्था कथं सहकारीतय्सं निक्षेपय् अप्वलय् १० प्रतिशत तक ब्याज बी दइसा त्यासाय् अप्वलय् १६ प्रतिशत तक जक ब्याज कायेदइगु जूगु खः ।
मेखे गुलिखे सरकारीतय्सं धाःसा न्हापांनिसें थ्व ब्याजदर स्वयां निदुगलं मल्याक अप्वः ब्याज बियाः निक्षेप मुंकेगु याना वयाच्वंगु दु ।

‘त्यासा व निक्षेपय्
ब्याजदरया सीमा तोके यात धयागु छगू जक खँ मखु, थ्व ज्यां सहकारीया स्वायत्तता हे लाका काःगु दु ।’

अथे जूबलय् थ्व सीमा कार्यान्वयन हे यायेमफइगु सः सहकारीतय्सं तया हयाच्वंगु दु । सरकारं ब्याजदरय् सीमा क्वःछिनाः सहकारीया स्वायत्ततायात तकं हाचां गाःगु द्वपं सहकारीकर्मीतय्सं बिया वयाच्वंगु दु । सरकारं सहकारीया स्वायत्तता लाकाकाःगु धासें संघर्ष समिति हे दयेकाः विरोधय् कुहां वःगु दु ।

थुकिया विरोधय् दयेकूगु उपत्यका सहकारी संघर्ष समितिया संयोजक टेकप्रसाद चौलागाईं बिबिसीलिसे खँ ल्हासें धाःगु दु ‘त्यासा व निक्षेपय् ब्याजदरया सीमा तोके यात धयागु छगू जक खँ मखु, थ्व ज्यां सहकारीया स्वायत्तता हे लाका काःगु दु ।’वय्कलं सरकारं सहकारीतय् स्वायत्तता हे लाका काःगुलिं विरोध यायेमाःगु खँ धयादीगु दु ।

थ्व विरोधया झ्वलय् संघर्ष समितिं सहकारीतय् मू संगठन राष्ट्रिय सहकारी महासंघयात नं ज्ञापन पत्र बियाः थ्व निर्णय कार्यान्वयन मयाकेगुली पहल यायेत धायेधुंकूगु दु ।महासंघया उपाध्यक्ष ओमदेवी मल्लं विरोध समितिं महासंघय् नं ज्ञापनपत्र लःल्हायेधुंकूगु धासें ब्याजदर बारे सरकारं याःगु निर्णय पुनरावलोकन याकेगु निंतिं महासंघपाखें पहल सुरु जूगु खँ धयादीगु दु ।

‘स्वनिगः लिसें देय्न्यंकंया थीथी सहकारीतय्सं ब्याज दर कार्यान्वयन यायेफइमखु धकाः सः थ्वयेका हःगुलिं सरकारी निर्णय पुनरावलोकनया निंतिं पहल सुरु जुइधुंकूगु दु’ वय्कलं धयादीगु दु । महासंघं थ्व सम्बन्धी सुझाव बीगु निंतिं थः दुजःतय्त निर्देशन नं बीधुंकूगु दु ।

दुजः सहकारी संस्थातय् सुझाव वयेधुंकाः थ्व निर्णय पुनरावलोकन यायेगु निंतिं सरकारयाथाय् वनाः पहल यायेगु खँ उपाध्यक्ष मल्लं धयादीगु दु ।मेखे सरकारी अधिकारीतय्सं धाःसां आः थ्व निर्णयय् पुनरावलोकन यायेगु मजुइगु खँ धाःगु दु । सरकारी अधिकारीतय् कथं यक्व सहकारीतय्सं थ्व निर्णय कार्यान्वयन यायेगु सुरु यायेधुंकूगु दु ।

सहकारी विभागया उपरजिष्ट्रार शशीकुमार लम्सालं सहकारी सकल दुजःतय् हितया निंतिं थ्व निर्णय जूगुलिं आः तुरुन्त थुकियात हिकेगु सम्भव मदुगु खँ धयादीगु दु । ब्याजदरया सीमा तोके यायेगु सम्बन्धय् सरकारं निर्णय याःबलय् महासंघ हे छगू कार्यदल दयेकाः सुझाव बिउगु खः । आः छुं सहकारीकर्मीतय्सं थुकी असहमति प्वंकाच्वंगुलिं पुनरावलोकनया पहल यानागु खँ महासंघया उपाध्यक्ष मल्लं धयादीगु दु ।