मस्तय् अनलाइन जोखिमपाखें सुरक्षित यायेत सरकार प्रतिबद्ध

यल (नेपालभाषा टाइम्स)- महिला, बालबालिका व जेष्ठ नागरिक मन्त्री नवलकिशोर शाह सुदीं युएइया राजधानी आबुधावी जूगु वी प्रोटेक्ट ग्लोबल एलाइन्स ग्लोबल समिट २०२४ य् न्ववानादिसें मस्तय्त अनलाइन जोखिमपाखें सुरक्षित यायेत नेपाः सरकार प्रतिबद्ध दु धयादीगु दु ।

शनिवाः जूगु ज्याझ्वलय् मन्त्री शाहं डिजिटल युगय् मस्तय् सुरक्षा सुनिश्चित यायेत सरकारं न्ह्याकाच्वंगु पलाःया बारे जानकारी बिसें ‘सरकारं मस्त व ल्याय्म्हतय्त अनलाइन जोखिमपाखें बचे यायेत बल्लाःगु नीति व कानुन विकास यानाच्वंगु दु’ धयादिल । थ्व झ्वलय् वय्कलं अनलाइनय् मस्त व ल्याय्म्हतय्त सुरक्षित यायेत प्रभावकारी ज्याझ्वः संचालन यायेगु निंतिं सरकार, गैरसरकारी संस्था, शैक्षिक संस्था व निजी क्षेत्र दथुइ सहकार्यया आवश्यक दुगु खँ कनादिल ।

चाइल्ड सेफनेट संस्थापक अध्यक्ष अनिल रघुवंशीं सरकारया प्रतिबद्धतायात लसकुस यासें धयादिल, ‘सरकारं अनलाइन यौन दुरुपयोग व शोषणपाखें मस्त व ल्याय्म्हतय्त सुरक्षित यायेगु निंतिं प्रतिबद्धता प्वंकूगुयात लसकुस याना । लिसें सरकारयात थ्व प्रतिबद्धतायात गम्भीरपूर्वक कायेत व मस्त व ल्याय्म्हतय्त सुरक्षित डिजिटल वातावरण सिर्जना यायेत गाक्क लगानी यायेत इनाप याना ।’

शिखर सम्मेलनया निन्हुया न्हि कुन्हु ‘माइ भ्वाइस माइ फ्युचर’ शीर्षकय् छगू भिडियो न्ह्यब्वःगु खः, गुकी नेपाः व नाइजेरियाया ल्याय्म्हतय् सः दुथ्याकातःगु दु । भिडियाय् मस्तय् निंतिं सुरक्षित डिजिटल संसार दयेकेत उमिगु दृष्टिकोण न्ह्यब्वयातःगु खः ।

वी प्रोटेक्ट ग्लोबल एलाइन्स व युएइया गृह मन्त्रालयं आबुधावी मंसिर १९ व २० गते निन्हुयंकं ग्लोबल समिटया ग्वसाः ग्वःगु खः ।