मलेशिया विवाद अझं यथावत

येँ – वैदेशिक रोजगारीया लागिं मलेशिया वनेत ठिक्क जुयाः नं वने मखंपिं द्वलंद्वः नेपाःमितय्त थ्वहे मंसिर १९ गते तकया दुने नं छ्वयेगु व्यवस्था सरकारं मयात धाःसा म्यानपावर कम्पनीत थःपिंसं हे माःगु पलाः ल्ह्वनेगु ख्याच्वः बिउगु दु ।

यदि सरकारं १९ गते तक नं मनू छ्वयेगु व्यवस्था मयात धाःसा थःपिंसं हे प्रक्रिया चले यायेगु जुइ धासें सकलें म्यानपावर कम्पनीतय्त नं अथे हे या धकाः वैदेशिक रोजगारी व्यवसायी संघं धाःगु दु । सरकारं मलेशियालिसे श्रम सम्झौता यायेगु लागिं नेपाःमित उखे मछ्वसे अडान कयाच्वंगु खः ।

उकुन्हु मलेशिया लिसे सम्झौता जूसां मलेशियां न्हापा हे वनेत फाराम भरे यानाः च्वनाच्वंपिं श्रमिकतय्त पुलांगु हे व्यवस्था कथं छ्वया हजि धायेवं हानं विवाद पिहां वःगु खः । मलेशियालिसे श्रम सम्झौताय् हस्ताक्षर जूगु लछि वनेधुंकलं नं उकिया कार्यान्वयन धाःसा जुइ फुगु मदुनि । थौंकन्हय् मलेशिया वनेत ठिक्क जुयाच्वंपिं म्हिं १५०० म्ह नेपाःमि श्रमिकत नेपालय् हे थानाच्वंगु खँ व्यवसायीतय्सं धाःगु दु ।