देय् नश्लवाद व वर्णवादं लिउने लाःगु खः

येँ – संघीय समाजवादी शिल्पी महासंघ प्रदेश नं. ३ या न्हापांगु भेला वंगु शनिवाः जुल । संघीय समाजवादी फोरम नेपालया सहअध्यक्ष राजेन्द्र श्रेष्ठया प्रमुख आतिथ्यताय् उगु भेला जूगु खः । ज्याझ्वलय् नवासें सहअध्यक्ष श्रेष्ठं हिन्दू वर्णाश्रम व्यवस्था कायम जुयाच्वंगुलिं हे नेपाः लिउने लानाच्वंगु खः धयादिल । तथाकथित दलित धयातःपिं शिल्पी समुदाययात कयाः जुयाच्वंगु अछुतया व्यवहार मानवीयता विरुद्ध कलंक जूगु धासें वय्कलं धयादिल, ‘हिन्दू वर्णाश्रमया कारण धर्मशास्त्रय् सतिं नं फये म्वाःगु पीडा शिल्पीतय्सं फये मालाच्वंगु दु ।’

‘कामदार वर्गयात उत्पादनया साधनपाखें बञ्चित याकेगु निंतिं हे वर्णवादी शासकतय्सं तथाकथित पूर्वजन्म, स्वर्ग व नरकया बाखंया रचना याःगु ख’ वय्कलं धयादिल, भूबनोटया दृष्टिं टारय् लः वइगु वा वःसां म्हो जक वइगु स्वाभाजिक खः, तर तुम्लिङटारय् लः मवःसा सतिं सराः बिउगु किम्बदन्तीया रचना यानाहल ।’

विकास मजूसां सतिं सराः बिउगु देय् धायेगु यानाच्वंगुयात कयाः वय्कलं यथार्थय् धायेगु खःसां नेपाः सुनानं सराः बिउगुलिं मखु, वर्णवाद व नश्लवादं लिउने लाःगु खः धयादिल । वय्कलं ससफो नेपालं शिल्पीतय्गु निंतिं नेकपा व कांग्रेसं थें भातृ संगठन जक मदयेकूसे पार्टीया संरचनाया रुपय् गैर भौगोलिक संघीयताकथं शिल्पी विशेष प्रदेश दयेकागु नं धयादिल । उगु भेलां दिपक विश्वकर्माया अध्यक्षताय् नीस्वम्हेसिया कार्यसमिति नं गठन याःगु खः ।