पं तयाः लँ पनीपिं कारवाही याइगु

येँ – स्वनिगलय् नं कोरोना ल्वचं कःपिं मनूत खने दया वयेवं कोरोना पनेगु नामय् त्वाःत्वालय् पं, खिपः व कथि तयाः लँ बन्द याइपिंत प्रहरीं कारवाही याइगु जूगु दु ।

वंगु निन्हु न्ह्यवंनिसें येँया कालिमाटी, ताहाचः, रवि भवन, लगं, खिचापुखू आदि लागाय् खिपः, पं थेंज्याःगु वस्तु तयाः लँ बन्द यायेगु ज्या तीव्र जुया वःगु दु । तर थुकिं यानाः मजिमगाःगु ज्याय् लँय् जुइपिंत समस्या जूगु जक मखुसें छुं कथंया आपतकालीन स्थिति वल धाःसा उद्धार यायेत तकं थाकुइगु अवस्था वये फुगु जुयाः अथे लँ पनेगु ज्या मयायेत गृह प्रशासनं इनाप याःगु दु ।

गनं नं लँ पनाच्वंगु खन धाःसा आः प्रहरीं उमित ज्वनाः कारवाही यायेगु तयारी न्ह्याकाच्वंगु खँ समेत सीदुगु दु । अथे लँ पनेगु ज्यां लँय् जुइपिंत समस्या जुइगु व कन्हय् वनाः थुकिं अराजक अवस्था समेत ब्वलंके फुगु जुयाः लँ पनेत तयातःगु पंकथि चीकेत नं प्रहरीं इनाप याःगु खः ।

थःगु त्वालय् अपरिचित मनूत सुं वल धाःसा अज्याःपिंत पनेगु लागिं लँपुइ अवरोध यायेगु सिबें स्थानीय मनूत थःपिं हे पुचः मुनाः पाः बीमाःगु खँ धयाहःगु दु । स्थानीय मनूतय्त अथे पाः बीगु ज्याय् सक्रिय यायेत स्थानीय निकाय व स्थानीय जनप्रतिनिधित लगे जुइमाःगु खँ नं धाःगु दु । थज्याःगु ज्या स्थानीय जनप्रतिनिधिया नेतृत्वय् जुल धाःसा अराजक अवस्था मब्वलनीगु व मजिमगाःगु ज्याय् पिहां वयेमाःपिंत नं सहज जुइगु खँ धाःगु दु ।

थ्वहे झ्वलय् सरकारं घोषणा यानातःगु लकडाउन तोडे यानाः पिहां जुइपिंत ज्वनाः कुने फइगु अधिकार प्रहरीयात बिउगु दु । लकडाउनयात कडा रुपं पालना याकेत आः शहरी लागाय् सेनायात समेत चाःहिके हयेगु तयारी सरकारं यानाच्वंगु खँ नं सीदुगु दु ।

लकडाउन धाःसां नं मनूत सनिलया ५ बजे जुल कि पिहां वइगु खने दुगुलिं वहे इलय् प्रहरीयात नगरया गल्लि गल्लिइ चाःहिके छ्वयेगु ज्या समेत यानाहःगु दु । लकडाउनयात कडा यायेगु झ्वलय् प्रहरीं म्हिगःनिसें खाद्यान्न पसः समेत चायेके मदइ कथं बन्द याकेगु शुरु याना हःगु दु ।