सहकारीं ताकेता याःगुलिं भ्वछिस्यां विष नल

येँ – नागार्जुन नगरपालिका–६ डाडापौवाय् छखा हे छेँया न्याम्हेस्यां विष नःगु घटनाय् आर्थिक कारण नं दुगु खँ सीदुगु दु । घटनास्थलं प्रहरीं बरामद याःगु ‘सुसाइड नोट’ य् ब्रिटिश गोर्खाली बचत तथा ऋण सहकारी संस्थां काःगु त्यासा पुलेत तःक्वःमछि ताकेता याःगुलिं विष नयागु खँ न्ह्यथनातःगु दु ।

महानगरीय प्रहरी वृत्त स्वयम्भूया कथं उगु नोटय् च्वयातःगु दु, ‘धम्की लिपा जि अन उपस्थित जुयाबलय् जितः अनया मेडम व ऋण शाखाया मनूतय्सं प्यघौ तक मानसिक यातना बिल व प्रहरी वृत्त जनेसवाय् नं यंकल । जितः अबलय् ताः ई तक आरोप प्रत्यारोपण यायेगु व भिडियो दयेकाः फुक्कं थासय् बेइज्जत याना बी धकाः प्रताडना बीगु ज्या नं याःगु खः ।’ अशक्त जूम्ह भीममान प्रधान व वय्कःया जहान मन्दिरा प्रधानं हस्ताक्षर यानातःगु नोटय् च्वयातःगु दु ।

उकथं हे नोटय् थः व छेँजःपिंत आत्महत्या यायेत ब्रिटिश गोर्खाली बचत तथा ऋण सहकारी संस्थां बाध्य याःगु खँ नं न्ह्यथनातःगु दु । वंगु सोमवाः बहनी ९ बजे भ्वछिं हे छेजःपिं अर्धबेहोसी अवस्थाय् लूगु खःसा वासः यायेगु झ्वलय् सवर्णमान प्रधान छम्ह मदुगु खः ।

प्रहरीया कथं विष नयाः अशक्त जूपिं इन्दिरामाया प्रधान, भीममान प्रधान, मन्दिरा प्रधान व सुप्रिया प्रधानया अवस्था गम्भीर दु । घटनास्थलं प्रहरीं प्यताजि किटनाशक वासःया प्याकेट नं बरामद याःगु दु ।