नीखुगः माइक्रोया रुट परमित खारेज, बसपार्कया काउन्टर खाली याकेत निर्देशन

यातायात व्यवसायीतय् हडतालय् सहभागी जूगुलिं सरकारं नीखुगः माइक्रोबसया रुट परमिट खारेज यानाबिउगु दु । यातायात व्यवस्था विभागं नयाबजाः–एनएसी रुटय् चले जुइगु २६ गः माइक्रोया रुट परमिट खारेज याःगु खः ।

थ्व रुटय् माइक्रो चले यानाच्वंपिंसं याकनं हे सरकारपाखें सहुलियत त्यासा कयाः बस न्यायेत्यंगु दु । सरकारया हे सुविधा कयाः बस न्यायेत्यंगु माइक्रो व्यवसायीतय्सं तकं सरकारया साथ मबिसे हडतालय् कुहां वयाः गाडी चले मयायेवं उमिगु रुट परमिट खारेज यानाबिउगु खः । थुपिं माइक्रो व्यवसायीतय्सं सरकारया ग्वाहालिं याकनः हे झिंन्हय्गः तग्वःगु बस हयेत्यंगु दु । उमिसं सरकारलिसे सम्झौता यानाः तग्वःगु बस हयेधुंकाः माइक्रो चिइकेत्यंगु खः ।

मेखे हडतालया झ्वलय् ग्वंगःबुँइ च्वंगु न्हू बसपार्कय् टिकट काउन्टर बन्द याःपिं यातायात व्यवसायीतय्त अन काउन्टर तयेके मबिइगु जूगु दु । थुकिया निंतिं सरकारं उमिगु काउन्टर खालि याकेत निर्देशन बीधुंकूगु दु । यातायात मन्त्रालयया निर्णय कथं यातायात व्यवस्था विभागं बसपार्क व्यवस्थापन यानाच्वंगु लोत्से बहुउद्देश्यीय प्रा.लियात काउन्टर खाली याकेत निर्देशन बिउगु खः ।

काउन्टर चिइकेगु निंतिं लोत्सें प्रहरीया सुरक्षा फ्वंगु दुसा गृहमन्त्रालयं प्रहरीयात बसपार्कय् सुरक्षा बीत निर्देशन नं बीधुंकूगु दु ।
सरकारं यातायात व्यवसायीतय् समिति खारेज यानाः व्यवसायीतय्त कम्पनीइ हयेत कडाइ यायेवं व्यवसायीत हडतालय् कुहां वःगु खः । व्यवसायी समितितय्सं यानाच्वंगु सिन्डिकेट चिइकेगु निंतिं सरकार कडा रुपं कुहां वयाच्वंगु दु ।