आकिवं वैशाख १० गते चितवनय् उपचुनाव लामिछानें ल्वाये खनी ला ?
येँ (नेपालभाषा टाइम्स)- राष्ट्रिय स्वतन्त्र पार्टीया सभापति रवि लामिछानेया सांसद पद खारेज जुइवं खाली जूवंगु चितवन क्षेत्र नं. २ लय् वि.सं. २०८९ सालया वैशाख १० गते उपचुनाव यायेगु धकाः निर्वाचन आयोगं मिति घोषणा यायेवं राजनीतिइ हानं मेगु तरंग पिहां वःगु दु ।
निर्वाचन आयोगं म्हिगः छगू वक्तव्य पिकासें थुकिया जानकारी बिउगु खः । वैशाख १० गते उपचुनाव यायेगु लागिं निर्वाचन आयोगं थौं फागुन १ गतेनिसें हे निर्वाचन सम्बन्धी ज्याखँ न्ह्याकेगु कार्यक्रम नं तयार याःगु दु । निर्वाचन आयोगं थनिंनिसें चैत १६ गते तक १६ गते तक मतदाता नामावली अद्यावधिक यायेगु ज्या जुइ । अथे हे उम्मेदवारी मनोनयन दर्ता चैत २० गते यायेगु ज्याझ्वः दुसा उकी दावी विरोध, नां लित कायेगु आदि थीथी ज्या लिपा चैत २३ गते निर्वाचन चिं बीगु ज्या जुइ ।
निर्वाचन आयोगं चितवनय् जुइगु उपचुनावया मिति सार्वजनिक यायेवं राजनीतिइ थीथी कथंया चर्चा परिचर्चा नं शुरु जूगु दुु । थ्व झ्वलय् रास्वपा सभापति रवि लामिछाने स्वयमं उगु थासं चुनाव ल्वाये खनी वा खनी मखु धइगु न्ह्यसः नं पिहां वःगु दु । नागरिकता सम्बन्धी केशय् दोषी ठहर जूम्ह लामिछानेया पासपोर्ट सम्बन्धी केशय् छानबिन जुयाच्वंगु दनि । पासपोर्टया अभियोग तसकं गम्भीर खः । यदि उकी दोषी ठहर जुल धाःसा जेल सजाय समेत जुइ । लिसें चुनाव गबलें नं ल्वाये खनी मखु । थज्याःगु गम्भीर केशय् छानबिन जुयाच्वंम्ह जूगुलिं वय्कलं चुनाव ल्वाये खनी वा खनी मखु धइगु खँय् समेत न्ह्यसः पिहां वःगु दु ।
यदि वय्कःया बारे छानबिन न्ह्यानाच्वंगु दयेक दयेकं नं वय्कः चुनावय् उम्मेदवार जुल धाःसा उकिया विरुद्ध नं रिट लाइगु सम्भावना दु । अज्याःगु अवस्थाय् अदालतं छु फैसला याइ धकाः पी मालीगु जुइ ।
अथे खःसां छुं जुयाः वय्कः चुनाव ल्वाये मखन हे धाःसां रास्वपां मेम्ह उम्मेदवार थनाः लामिछानेया पक्षय् गुलि जनमत दु धकाः परीक्षण धाःसा याये फइगु खनेदु ।
उकुन्हुया चुनावय् उजुरी लायेक लायेकं नं वय्कःयात चुनाव ल्वाके बिउगु जुयाः आपालं विवाद पिहां वःगु कारणं थुपालय् अज्याःगु खँय् नं निर्वाचन आयोग गम्भीर जुइगु खनेदु ।
LEAVE YOUR COMMENTS