ओलीया प्रस्ताव नेपाल पक्षं अस्वीकार

येँ -नेपाल (एमाले)या माधव नेपाल पक्षं अध्यक्ष लिसें प्रधानमन्त्री केपी ओलीं न्ह्यःने हःगु एकताया प्रस्तावयात स्वीकार याःगु दु । म्हिगः भच्र्युअल माध्यमं च्वंगु पार्टी स्थायी कमिटीया बैठकं थ्व अस्वीकारया निर्णय याःगु खः ।

प्रम ओलीं न्ह्यःने हःगु खुगू बुँदाया एकता प्रस्ताव पार्टी एकताया पक्षय् मदुगुलिं उकियात अस्वीकार यायेमाःगु निर्णय बैठकं याःगु खः । नापं बैठकं प्रम ओलीया प्रस्ताव अझ नं जालझेल पूर्ण जूगु निष्कर्ष नं पिकाःगु दु ।

नेपाल पक्षं धाथें पार्टी एकता यायेगु खःसा थःपिसं वंगु वैशाख २६ गते प्रस्ताव यानागु खुगू बुँदायात स्वीकार यायेमाःगु शर्त न्ह्यःने तःगु दु । प्रम ओलीं थःपिनिगु थ्व शर्त पालना याइगु सम्भावना मदुगुलिं संसद पुनस्र्थापनाया निंतिं थःगु पक्षं सर्वोच्च अदालतय् तयागु रिट लित मकायेगु निर्णय नं नेपाल पक्षं याःगु दु । प्रम ओलीं सार्वजनिक याःगु आह्वानय् सर्वोच्च अदालतय् दर्ता जूगु मुद्दा लित कायेमाःगु प्रस्ताव यानातःगु खः ।

प्रम ओलीया सार्वजनिक आह्वानय् थः २०७५ जेठ ३ गतेया अवस्थाय् लिहां वनेत तयार दु धयातःगु दुसा उकियात कयाः नं म्हिगः सहलह जूगु खः । थःपिंसं जेठ ३ मखु जेठ २ गतेया अवस्थाय् लिहां वनेगु धयागु खः धासें जेठ ३ या अवस्था धइगु माओवादी केन्द्र त्वःता वःपिंत नं पार्टीइ दुथ्याकाः थःगु बहुमत कायम याना तयेगु ओलीया कुतः खः धकाः नं निष्कर्ष पिकाःगु दु ।