डब्लुएनओया डब्लुडीबीया न्यासः ब्व व सिरपाः लःल्हायेगु ज्याझ्वः
येँ(नेपालभाषा टाइम्स)- वल्र्ड नेवाः अर्गनाइजेसन (डब्लुएनओं) न्ह्याका वयाच्वंगु ‘डब्लूएनओ न्हियान्हिथं प्रसारण (डब्लूडीबी)’ ज्याझ्वः न्यासःगु ल्याः थ्यंगु दु । डब्लुडीबी ज्याझ्वः न्यासःगू ल्याः थ्यंगु लसताय् जूगु ज्याझ्वःया झ्वलय् डब्लुएनओया ग्वसालय् जूगु यःमरि दयेके धेंधेंबल्लाः कासाय् विजयी जुयादीपिंत सिरपाः नं लःल्हाःगु खः ।
डब्लुएनओपाखें सन् २०२१ जुलाई २९ निसें थौंतक विश्वन्यंकंया नेवाः समुदायया थीथी पक्षयात कःघानाः न्हियान्हिथं खँल्हाबल्हाया रुपय् थुगु ज्याझ्वः मदिक्क न्ह्याका वयाच्वंगु दु । जूमअनलाइनपाखें डब्लुएनओया फेसबुकपेजपाखें नं न्ह्याका वयाच्वंगु थुगु ज्याझ्वलय् विश्वया कुं कुलामय् च्वंपिं थीथी नेवाःतय्त ब्वनाः खँल्हाबल्हा याना वयाच्वंगु खः ।
नेपालभाषा, कला, संस्कृति, साहित्य, सम्पदा, संगीत, विज्ञान प्रविधि, इतिहास, अर्थ, वित्त, राजनीति, शिक्षा, चिकित्सा, कानून, कासा, नेवाः पहिचान आदि ख्यलय् थःगु थासं देश विदेशय् च्वनाः योगदान बिया वयाच्वनादीपिं नेवाः व्यक्तियात ब्वनाः वय्कःपिनिगु अनुभव कालबिल यायेगु ल्याखं खँल्हाबल्हा ज्याझ्वः न्ह्याका वयाच्वंगु खः ।
डब्लुडीबी ज्याझ्वः न्यासःगू ल्याः थ्यंगु लसताय् जूगु विशेष ज्याझ्वलय् मूपाहांकथं ब्वति कयादीम्ह जनकवि दुर्गालाल श्रेष्ठं ज्याझ्वःयात भिंतुना देछासे निरन्तर रुपं ज्याझ्वः न्ह्याके फयेमा धकाः सुवाः बियादिल । लिसें वय्कलं थुकथंया ज्याझ्वलं यानाः असं व अमेरिका सतिना वनाच्वंगु तर असनं वंघः धाःसा तापाना वनाच्वंगु यथार्थयात कुलादिसें झी इलय् सचेत जुइत नं इनाप यानादिल ।
ज्याझ्वःया विशेष पाहां समाजसेवीनापं व्यवसायी कर्ण शाक्यं सकारात्मक सोच व डब्लुएनओ छगू हे उद्देश्य ज्वनाः न्ह्यःने वनाच्वंगु खँय् लसता प्वंकादिसें ज्याझ्वः सुथां लाक्क न्ह्याना च्वनेमा धकाः भिंतुना बियादिल ।
डब्लुएओया नायः संयुक्त श्रेष्ठं ज्याझ्वःयात निरन्तरता बिया यंकेगु प्रतिवद्धता प्व.कादीगु खःसा पुलांम्ह नायः सिजन श्रेष्ठं थुगु ज्याझ्वः शुरु जूगु ईया अवस्था बारे जानकारी बियादिसें ज्याझ्वः थनतक थ्यंकेत ग्वाहालि यानादीपिंत सुभाय् देछानादिल ।
अमेरिकाया न्यूयोर्कय् च्वनादीम्ह डा. नरेशमान शाक्यं डब्लुडीबीइा आतकया ज्याझ्वःया समीक्षा यानादीगु खःसा थुकिया परिकल्पनाकार दिपेशमान शाक्यं डब्लुडीबीया भिडियोयात गुकथं छ्यलाबुलाय् हये फइ धइगु जानकारी बियादिसें डब्लुडीबीया न्हूगु वेबसाइटया नं सार्वजनिक यानादीगु खः ।
ज्याझ्वलय् डब्लुडीबी ज्याझ्वः निरन्तर रुपं न्ह्याका वयाच्वनादीपिं सिल्भिया राजोपाध्याय, नितु डंगोल व विगेन तुलाधर व डा. नरेशमान शाक्ययात हनापौ नं देछाःगु खः ।
थुगु हे ज्याझ्वय् डब्लुएओया ग्वसालय् यःमरि पुन्हिया लसताय् भर्चअल रुपं जूगु यःमरि दयेके धेंधेंबल्लाः कासा ११४३य् विजयी जुयादीपिंत सिरपाः नं लःल्हाःगु खः । कासाय् मय्जु पे्रमहिरा तुलाधर न्हाप, हरिनाथ डंगोल (खोकना पुचः) लिउ, मोहिनि तुलाधर व शर्मिला तण्डुकार लियांलिउ लाःगु खःसा न्याम्हेसित हःपाः सिरपाः नंलःल्हाःगु खः।
LEAVE YOUR COMMENTS