१२ गू तगिंतक नेपालभाषा ब्वंकेत ज्ञापन पौ
येँ(नेपालभाषा टाइम्स)- रत्नराज्य (आरआर) क्याम्पसया नेवाः विद्यार्थीतय् संगठन नेवाः विद्यार्थी युनियनं १२ गू तगिं तक नेपालभाषा विषय ब्वंकेगु व्यवस्था यायेत माग याःगु दु । युनियनं १२ गू तगिं तक नेपालभाषा विषय अध्ययन, अध्यापनया व्यवस्थथा यायेत माग यासें शिक्षा, विज्ञान व प्रविधि मन्त्री अशोक राईयात नाप लानाः ज्ञापन पौ लःल्हासे उकथं माग याःगु खः ।
युनियनया अध्यक्ष रिदेन महर्जन, दुजः सुमित रंजित लगायतं मन्त्री राईयात नाप लानाः ज्ञापन पौ लःल्हाःगु खः । युनियनं मन्त्री राईयात लःल्हाःगु ज्ञापन पती नेपाःया संविधानय् मातृभाषा शिक्षाया अधिकार खँ न्ह्यथनातःगु जूसां संविधान कार्यान्वयनय् वःगु थौं च्यादँ दयेधुंकाः नं व्यवहारिक रुपं कार्यान्वयनय् मवःगु व भाषा आयोगं तकं च्यागू तगिंनिसें च्वय्या तगिमय् मांभासं अनिवार्य पठनपाठनया याकेगु व्यवस्था यायेत सिफारिस याःगुयात याकनं कार्यान्वयनय् हयेत माग याःगु दु ।
२०२८ सालय् न्हूगु शिक्षा नीति लागू जुइधुंकाः स्वनिगःया दक्वं ब्वनेकुथिया क्वय्या तगिमय् गनं नं नेपालभाषा ब्वंकेगु मयाःगु व गुंगू तगिंनिसें एसइइ (एसएलसी) परीाक्षा बीगु इलय् कम्प्यटर विज्ञान, ऐच्छिक गणितलिसें ऐच्छिक नेपालभाषा विषय दुथ्याकाः मांभासं आखः ब्वने दइगु अधिकारयात बञ्चित यायेत स्वःगु धासें उकियात खारेज यायेत नं युनियनं माग याःगु दु ।
न्हापा स्वनिगःया दक्वं कलेजय् नेपालभाषा विषय अध्ययन याइपिं ब्वँमिपिं आपालं दुगु तर न्हूगु शिक्षा नीति वयेधुंकाः उकी जुयाच्वंगु व्यवस्थां यानाः कलेजय् नेपालभाषा ब्वनीपिं गाक्कं म्हो जूगु खँ न्हयथँसें आः च्यागू तगिं तक जक मखसे झिंनिगू तगिं तक हे अनिवार्य नेपालभाषा विषय ब्वंकेगु व्यवस्था यायेमाःगु युनियनं लःल्हाःगु ज्ञापन पती माग यानातःगु दु ।
व्यक्तिगत वा संस्थागत रुपं नेपालभाषां ब्वंकेगु व्यवस्था यायेत आपालं कुतः जुया वयाच्वंगु दुसां राज्यपाखें दक्वं स्कुलय् ब्वंकेगु व्यवस्था मयाःतले उकथंया कुतः वा अभियानं सार्थकता काइगु सम्भावना मदु धासें खस भाय्या निंतिं राज्यया धुकूपाखें गाक्कं खर्च यायेगु तर नेपालभाषाया निंतिं धाःसा थ्व आन्दोलनय् लगे जुयाच्वंपिंसं थःगु खल्तीं खर्च यानाच्वनेगु सम्भव मजुइगुलिं राज्यं हे नेपालभाषा ब्वंकेत बजेटया व्यवस्था यायेततकं ज्ञापन पती धयातःगु दु ।
मन्त्री राई स्वयम छम्ह राज्यपाखें उत्पीडनय् लाकातःगु जातिपाखें प्रतिनिधित्व यानाच्वंम्ह जूगुलिं फत्तले छिगु हे कार्यकालय् थ्व ऐतिहासिक दायित्व पूवंकेगु ज्या जुइ धइगु भलसा कयाच्वना धकाः नं ज्ञापन पती न्ह्यथनातःगु दु । उगु इलय् नेवाः देय् दबूया केन्द्रीय नायः पवित्र वज्राचार्यलिसें आपालं भाषिक व मांभाय् शिक्षाया अभियन्तातय् उपस्थिति दुगु खः ।
LEAVE YOUR COMMENTS