मुख्यमन्त्री हिलेत नेपाल असहमत
येँ (नेपालभाषा टाइम्स)÷बागमति प्रदेशया मुख्यमन्त्री हिलेगु निंतिं कांग्रेस व माओवादीं हस्ताक्षर संकलन यायेवं नेकपा (एस) या अध्यक्ष माधव नेपालं कांग्रेस व माओवादीया अध्यक्षपिंत नापलायेगु कुतः यानादीगु दु । तर नापलाये धाःसा मफुनि ।
सूत्रं धाःकथं नेता नेपालं यदि मुख्यमन्त्री हिलेगु खःसा बागमति जक मखु फुक्क हे प्रदेशया मुख्यमन्त्री हिलेमाः धइगु खँ न्ह्यःने हयादीगु दु । वय्कलं कांग्रेस व माओवादीया अध्यक्षपिं नापलानाः थ्वहे खँ न्ह्यथनेगु कुतः यानाच्वंगु खँ धाःगु दु ।
अध्यक्ष नेपालं बागमतिइ मुख्यमन्त्री हिलेगु खःसा कर्णालीइ छाय् महिलेगु धकाः न्ह्यसः तयेगु यानाच्वंगु खँ नं धाःगु दु । बागमति प्रदेशय् मुख्यमन्त्री हिलेगु खँ वयेवं मुख्यमन्त्री राजेन्द्र पाण्डे येँय् वयाः पार्टी अध्यक्ष नेपालयात नापलानाः सहलह याःगु खँ सीदुगु दु ।
पाण्डे मुख्यमन्त्री जुइ न्ह्यः नेपाली कांग्रेसलिसे बछि बछि सरकारया नेतृत्व यायेगु सहमति जूगु खःसा उगु सहमति सार्वजनिक जुइवं कांग्रेसं उगु वहेकथं नेकपा एसपाखें सरकार त्वःतेमाःगु खँ हःगु खः । मुख्यमन्त्री पाण्डें धाःसा सत्ता गठबन्धनया निर्णय लिपा जक पद त्वःतेगु खँ धाःगु दु ।
थ्वहे झ्वलय् मुख्यमन्त्री पाण्डें थौं संसदीय दलया बैठक सःतादीगु दु । पाण्डे थौं ११ बजे च्वनेगु कथं बागमति प्रदेशया संसदीय दलया बैठक सःतूगु खः ।
थ्वहे झ्वलय् बागमति प्रदेशय् कांग्रेस संसदीय दलया नेता इन्द्र बानियां प्रदेशय् सरकार हिउसां नं सत्तारुढ दलया गठबन्धनयात छुं नं कथंया लिच्वः मलाइगु खँ धयादीगु दु । बागमति प्रदेश व सुदूरपश्चिम प्रदेशय् सरकार हिउसां छुं लिच्वः मलाइगु खँ नेता बानियाँ धयादीगु खः ।
LEAVE YOUR COMMENTS