तिथि मिति विवाद ज्यंकेत अभियान शुरु
येँ (नेपालभाषा टाइम्स)- नेवाः संस्कृति हनेगु तिथि विवाद ज्यंकेगु निंतिं अभियान शुरू जूगु दु ।वंगु कछलागा सप्तमि कुन्हु नेपाल ज्योतिष परिषद् उपत्यका समितिया न्हूगु नेतृत्वयात ख्येँ सगं देछासें थ्व अभियान सुरु याःगु खः । ज्याझ्वः नेवाः देय् दबू स्वनिगः विशेष प्रदेशया संयोजनय् मध्यपुर थिमि नगर समितिया ग्वसालय् जूगु खः ।
ज्याझ्वलय् न्ववासें नेवाः देय् दबू स्वनिगः विशेष प्रदेशया नायः श्रीकृष्ण महर्जनं तिथि मिति विवादयात ज्यंकेगु नितिं थनिनिसें हे पहलकदमि शुरु जूगु धयादिसें आः याकनं हे नेवाः ज्योतिषतय्गु सम्मेलन यायेमाःगु, येँया जनबहाः, यलया क्वाःबहाः व ख्वपया तलेजुया पुजारी नापं स्वनिगःया थीथी लागाय् कर्मकाण्डया निंतिं भूमिका म्हिता वयाच्वंपिं ज्योतिष, जोशी, बज्राचार्य, राजोपाध्याय, कर्माचार्यत लिसें सरोकारवालापिंत छगू हे थासय् मुंकाः सहलह ब्याका वनेमाःगु खँय् बः बियादल ।
नेवाः देय् दबू येँ, यल व ख्वप जिल्ला समितिया प्रतिनिधि नापं थीथी ब्यक्तित्वपिं उपस्थित जुयादीगु ज्याझ्वलय् नेपाल ज्योतिष परिषद उपत्यका समितिया नायः ज्योतिष यज्ञरत्न बज्राचार्यं नेवाःतय्गु तिथिया विवाद ज्यंकाः वनेगु निंतिं सकलें छप्पँ जुयाः वनेमाःगु नापं थःगु नेतृत्वय् दुगु ज्योतिष परिषदं नं माःगु कथं भूमिका म्हितेगु बचं बियादिल ।
थौंकन्हय् तिथि मिति विवादया कारणं संस्कृति हनेगुलिइ तसकं लिच्वः लानाच्वंगु दु । विशेष याना स्वन्ति नखः हनेगु सवालय् लक्ष्मी पुजा, म्हपुजा, किजा पुजा गुकुन्हु हनेगु धयागु विवादया कारणं अप्वः याना नेवाःतसें नेवाः संस्कृतिया ल्याखं तिथि विवाद याये मजिल धकाः सः तयावयाच्वंगु खः । स्वन्ति नखः जक मखु मोहनि, गुंपुन्हि, चथाः थेंज्याःगु नखः हनेगुलिइ विवाद जुयावयाच्वंगु दु ।
प्यदँ लिपा ला झन छयमास वइ । अबलय् लक्ष्मी पुजाया कन्हय्कुन्हु निसें मनमास लाःगुलिं लक्ष्मीपुजाया लच्छि लिपा जक म्हपुजाया न्हि लानाच्वंगु दु । थज्याःगु हे विवाद ज्यंकेगु निंतिं थ्व अभियान न्ह्याकूगु खः ।
LEAVE YOUR COMMENTS