बुंगद्यःलिसे स्वाःम्ह किपूया याकःमिसायात गुथिया भत्ता
किपू (नेपालभाषा टाइम्स)÷बुंगद्यः जात्राय् किपूलिसे स्वाःम्ह प्यंगःथांया याकः मिसायात गुथि संस्थानपाखें भत्ताया व्यवस्था याःगु दु । थ्व खँ सार्वजनिक यायेत म्हिगः किपुलिइ याःगु ज्याझ्वलय् किपू नगरपालिकाया मेयर राजकुमार नकःमिं याकःमिसायात आः किपू नगरपालिकापाखें नं भत्ता बीगु घोषणा यानादीगु खः ।
याकः मिसायात गुथि संस्थानं दरबन्दी कायम यानाः राष्ट्रिय मान्यता बीगु निर्णय सार्वजनिक यायेत म्हिगः किपुलिइ ज्याझ्वः याःगु खः ।
गुथि संस्थानं दरबन्दी कायम यासें याकः मिसायात दँय् ५,५५५ तका भत्ता बीगु निर्णय याःगु खः । मेयर नकःमिं आः नगरपालिकापाखें बिस्कं भत्ता बीगु नितिं याकनं हे नगरपालिकाया मुँज्या च्वनाः निर्णय यायेगु खँ कनादिल ।
किपू नगरपालिकाया उपमेयर सुनिता शाक्य महर्जनं लसकुस यासें न्ह्याःगु ज्याझ्वलय् गुथिं संस्थानया प्रशासकीय प्रमुख किरण शाक्यं याकः मिसायात गुथिं संस्थानं बीगु भत्ता दँय् झिगू प्रतिशत थकायेगु खँ नं कनादिल ।
ज्याझ्वलय् याकः मिसाया दरबन्दी कायम यायेगु योगदान यानादीम्ह प्रशासकीय प्रमुख किरण शाक्य व ज्यापु समाज यलया नायः तीर्थ महर्जनयात सुभाय् पौ न लःल्हाःगु खः ।
LEAVE YOUR COMMENTS