सक्वय् धलं दनाच्वंपिं व्रतालु देश दर्शनय्

येँ – सक्वय् माधवनाराणया धलं दनाच्वंपिं व्रतालुत देश दर्शन यात्राया निंतिं वंगु दु । थ्व झ्वलय् धलं दनाच्वंपिं सकसिनं सोमवाः सुथ न्हापां पशुपतिइ वयाः बागमति खुसिइ म्वःल्हूगु खः । धार्मिक, पौराणिक व सांस्कृतिक सहर सक्व देशं शुरु जूगु माधवनारायणया धलं दनाच्वंपिं आइतवाः सनिलय् पशुपतिइ ध्यंकः वःगु खः ।

लछिया अवधि दुने माधवनाराणया धलं दंपिं सकलें पशुपति, फम्पि, दक्षिणकाली, पन्ति, भ्वत, चाँगुनारायण, शंखम्वः लगायतया तीर्थस्थलय् वनेमाःगु प्रचलन दु । थथे देश दर्शनया निंतिं वनेबलय् खालि तुतिं न्यासि हे वनेमाःगु धलं दनेगु विधि दुनेया छगू नियम खः ।
स्वस्थानीया बाखं कनेगु झ्वलय् सक्वय् लछियंकं न्ह्याइगु मेलाया झ्वलय् अन माधवनारायणया धलं दनेगु चलन दु ।

वंगु पोहेलाथ्व मिलापुन्हिकुन्हु निसें शुरु जूगु स्वस्थानीया झ्वलय् सक्वय् माधवनारायणया धलं दनीपिंसं पुन्हि छन्हु न्ह्यः ल्हाःतुतिया लुसि ध्यनाः, एकचित्त जुयाः निराहार च्वनेमाः । पुन्हिकुन्हु सुथ न्हापां म्वःल्हुयाः पुजा यायेगु व शंखजल ग्रहण यानाः मन्त्रोचारण यासें धलं दनेगु प्रचलन जुल । मन्त्रोचारणलिपा शंखजल ग्रहण यासें धलं दनेगु इलय् लछियंकं लाकां न्ह्याये मजिउगु, चि नये मजिउगु, मेपिंत थी मजिउ धइगु आदि विधि दु ।