ने. सं. ११४४ ञलाथ्व नवमी -

न्हूगु उपकरणपाखें जलविन्दु उपचार

येँ – थनया त्रिपुरेश्वरय् च्वंगु नेपाल आँखा अस्पतालय् जलविन्दु ल्वय्या उपचार शुरु जूगु दु । अस्पतालं जलविन्दुया उपचारया निंतिं नेपालय् न्हापांखुुसी उच्च प्रविधिया उपकरणपाखें सेवा प्रवाह याःगु खः । ‘ ‘सुप्रा ८१० इनफ्रेर्ड लेजर’ नांया उपकरणपाखें जलविन्दु जक मखसे मिखाया पर्दाय् जुइगु ल्वय्यातकं उपचार शुरु यानागु अस्पताल प्रशासनं जानकारी बिउगु दु ।

उगु उपकरणपाखें उपचार यायेबलय् मिखाया दुनेया चापयात लिच्वः मलाकुसे जलविन्दुपाखें मिखाय् जुइगु क्षतियात न्यूनीकरण यायेत ग्वाहालि जुइगु चिकित्सकं धाःगु दु । जलविन्दु ल्वय्यात मिखाया दृष्टि कमजोर याइगु जक मखसे दृष्टिविहीन हे याइगु समस्याया रुपय् कायेगु याः । जलविन्दु जुइ न्ह्यः अज्याःगु छुं नं लक्षण खने मदइगु जूगुलिं थ्व ल्वचं मिखाया दुष्टिइ तसकं क्षति याइ ।

मिखाया दृष्टिइ क्षति याये धुंकाः जक थ्व ल्वय्या बारे जानकारी दइगु अस्पतालया प्रमुख कार्यकारी अधिकृत दमनबहादुर घलें जानकारी बियादिल । अन्धोपन सम्बन्धी छगू सर्वेक्षणया तथ्यांककथं जलविन्दुयात अन्धोपनया स्वंगूगु प्रमुख कारणया रुपय् नं कायेगु याः ।

अप्वःथें ४० दँ पुलेधुंकूपिंत जुइगु थ्व ल्वय् वंशानुगत व मेमेगु कारणं नं थ्व ल्वचं कयेफुगु अस्पतालं जारी याःगु विज्ञप्तीइ धयातःगु दु ।
अस्पतालया तथ्यांकककथं दँय्दसं पीन्यासः स्वयां अप्वः जलविन्दुया ल्वगित वासः याकेत वयाच्वंगु अस्पतालय् वयेगु यानाच्वंगु दु ।