‘भाषा आन्दोलनया बलं भाषा ऐन वयेत्यंगु खः’

येँ (नेपालभाषा टाइम्स)- बागमति प्रदेशया पर्यटन, सहकारी व उद्योगमन्त्री पुकार महर्जनं नेवाः व तामाङतय्गु भाषा आन्दोलनया उपलब्धी कथं बागमति प्रदेशपाखें भाषा ऐन हयेत्यंगु खँ धयादीगु दु ।

किपुलिइ शनिवाः जूगु सहलह मुँज्याय् मन्त्री महर्जनं थ्व खँ धयादीगु खः । वय्कलं नेवाः व तामाङतय्गु आन्दोलनया बलं हे प्रदेश सरकारं नेवाः भाय् व तामाङ भाय्यात बागमति प्रदेशया सरकारी कामकाजी भाषाया रुपय् लागू यायेगु निंतिं ऐन हयेगु अन्तिम चरणय् थ्यंगु खँ धयादीगु खः ।
नेवाः देय् दबू स्वनिगः विशेष प्रदेशया संयोजनय् जूगु उगु सहलह मुँज्याय् भाषा आयोगया दुजः नापं भाषा वैज्ञानिक प्रा. डा. ओमकारेश्वर श्रेष्ठ व अमृत योञ्जनपिंसं नं भाषा ऐनया महत्वयात कया खँ तयादीगु खः ।

ज्याझ्वलय् बागमति प्रदेशं हयेत्यंगु राष्ट्रभाषा ऐनय् दुगु खँयात नेवाः देय् दबू स्वनिगः विशेष प्रदेशया नायः श्रीकृष्ण महर्जनं न्ह्यब्वयादीगु खः । ज्याझ्वलय् भाषाख्यःयापिं नापं थीथी व्यक्तित्वपिनिगु सहभागीता दुगु खः । ज्याझ्वलय् वःगु न्ह्यसः व सुझावयात कयाः मन्त्री महर्जनं लिसः बियादीगु खः । ज्याझ्वलय् आः याकनं हे देय् दबू स्वनिगः विशेष प्रदेशपाखें बागमतिी प्रदेशया राजधानी हेटौडाय् हे वनाः प्रदेश सांसदतलिसे उगु ऐनया बारे सहलह ब्याकीगु जानकारी नं बिउगु खः ।