अपहरण प्रकरण : जिल्ला सरकारी वकिलया ज्याकूथी मुद्दा दर्ता

येँ – जनता समाजवादी पार्टीया नेता डा. सुरेन्द्र यादवं थःत अपहरण याःगु धासें जिल्ला सरकारी वकिलया ज्याकूथी येँय् उजुरी दर्ता यानादीगु दु ।

नेता यादवं जनकपुरं थःत अपहरण यानाः हःगु धासें सोमवाः पुलाम्ह आइजिपी सर्वेन्द्र खनाल व निम्ह सांसद्त महेश बस्नेत व किसान श्रेष्ठ विरुद्ध उजुरी दर्ता यानादीगु खः । वय्कलं दर्ता यानादीगु उजुरीया नम्बर १०४७ खः ।

थ्वस्वयां न्ह्यः वैशाख १६ गते नं जोहरी दर्ता यायेगु निंतिं वय्कः जिल्ला सरकारी वकिलया ज्याकूथी थ्यंकादीगु खः । तर उगु इलय् जाहेरी अध्ययन यायेमाःगु धासें सरकारी ज्याकूया अधिकारीतय्सं दर्ता यायेत अस्वीकार यानादीगु खः ।

वयां लिपा वय्कलं अपहरण याःपिंसं थःगु ज्यान नं कायेफुगु जोखिम दुगु धासें राष्ट्रिय मानव अधिकार आयोगया ध्यानाकर्षण याकूगु खः ।

उखे पुलाम्ह आइजिपी सर्वेन्द्र खनाल व सांसद्त महेश बस्नेत व किसान श्रेष्ठं थःपिंसं नेता यादवया अपहरण मयानागु धासें थाैं राष्ट्रिय मानव अधिकार आयोगय् उजुरी दर्ता याकूगु दु । उजुरीइ थःपिनि मानहानी याःगु व अपहरण याःगु धासें फसे यायेत स्वःगु खँ न्ह्यःथनातःगु दु ।