नेवाः गुथि कुवेतया न्हूदँया भिंतुना व म्हपुजा

येँ – नेवाः गुथि कुवेतं नेपाल संवत् ११४० लिसें म्हपुजा तःजिक हंगु दु । कुवेतया फरवानियाय् च्वंगु युनिक अडिटोरियम हलय् जूगु ज्याझ्वलय् कुवेतय् च्वनाच्वंपिं सकलें नेवाः दाजुकिजालिसें नेपाली राजदूतावास, एनआरएन कुवेत, कुवेतय् सक्रिया संघसंस्थालिसें पत्रकार, नेपाली समाज लगायतया सहभागिता दुगु खः ।

नेपाल संवत् ११४० न्हूदँ क्यंगु लसताय् भिंतुना कालबिल यासें न्ह्याःगु म्हपुजाय् नेवाःलिसें आपालं ल्याखय् गैर नेवाःतय्गु नं सहभागिता दुगु खः ।संस्थाया नायः सुरज मास्केया अध्यक्षताय् जूगु ज्याझ्वलय् कुवेतया निंतिं नेपाःया राजदूत दुर्गाप्रसाद भण्डारी मूपाहांकथं झायादीगु खः ।

ज्याझ्वलय् संस्थाया संरक्षक शिव श्रेष्ठ, सल्लाहकार कल्याण्डकुमार श्रेष्ठ, जनजाति महासंघया अमृत तामांग, किरात राई यायोक्खाया अध्यक्ष मंजित राइ, एनआरएन कुवेतया अध्यक्ष सुजन केसी, पत्रकार महासंघया हरिकृष्ण न्यौपाने लगायतं न्हूदँया भिंतुना बियादिसें म्हपुजा नं याकादीगु खः ।

मूपाहां राजदूत भण्डारीं त्वाःदेवाय् मत च्याकाः ज्याझ्वः उलेज्या यानादिसें विविधताय् अनेकता व अनेकताय् एकता दुगु झीगु देय् नेपालय् आपालं भाय्, कला, संस्कृति दुगुलिं संस्कृतिया तःमिगु देय् जूगु धयादिल ।

नेवाः गुथि कुवेतं याना वयाच्वंगु थीथी ज्याझ्वःया बारे मूछ्याञ्जे नवीन कुमार श्रेष्ठं जानकारी बियादीगु खःसा ज्याझ्वःया कजि उदाश श्रेष्ठं नेवाः भासं हे म्हपुजाया विधि जानकारी बियादिसें सकसितं लसकुस यानादीगु खः । ज्याझ्वःया कजि श्रेष्ठ नेवाः भासं व छयाञ्जे ध्रुवकुमार श्रेष्ठं खय् भासं म्हपुजाया जानकारी बियादीगु खः ।

नेपालभाषा टाइम्स

च्वमिया मेमेगु

• अमेरिकां लित बिल खुया यंकूगु निगू मूर्ति
• नेवाः हाइकु ख्यः न्हय्‌क्वःगु बुसादँ हना
• महाकवि सिद्धिदासया बुन्हिया लसताय् चिनाखँ व किपा च्वज्या कासा
• एनओएया रजत जयन्ती व न्हूधाः
• सामाजिक संजालं लुइकल स्वंगू दशक न्ह्यः तंगु मूर्ति