खुसि मापदण्डया फैसला विरुद्ध कंस मार्चपास
येँ(नेपालभाषा टाइम्स)- स्वनिगःया थीथी खुसि सिथय् ४० मिटर थाय् त्वःताः जक छेँ दने दइ धकाः सर्वोच्च अदालतं याःगु फैसला विरुद्ध नदी मापदण्ड पीडित संघर्ष समितिं कंस विहीवाः (मंसिर ६ गते) येँय् वृहत् प्रदर्शन याइगु जूगु दु । सर्वोच्चया उगु मापदण्ड विरुद्ध सरकारं तःगु पुनरावलोकनयात कयाः सर्वोच्चय् वकुन्हु पेशी तयातःगु दु । पुनरावेदनया पक्षय् मापदण्डया विरोध यासें पीडिततय्सं उगु प्रदर्शन यायेत्यंगु खः ।
छुं ई न्ह्यः जक सर्वोच्च अदालतं स्वनिगःया बागमति, बिष्णुमति व मनोहरा खुसि सिथय् ४० मिटर थाय् त्वःताः जक छेँ दने दइ धकाः फैसला याःगु खः । उगु मापदण्ड दुने लाःगु जग्गा फुक्क क्षतिपूर्ति पुलाः सरकारं अधिग्रहण या धकाः नं फैसलाय् न्ह्यथनातःगु खः । तर सरकारं थ्व मापदण्ड लागू जुल धाःसा स्वनिगःया आपालं मनूत छेँबुँविहिन जुइगु लिसें उमित क्षतिपूर्ति बीगु लागिं सरकारयाके ध्यबा नं मदु धासें फैसला विरुद्ध पुनरावलोकनया निवेदन तःगु खः ।
उगु मापदण्डयात कयाः पीडिततय्सं संघर्ष समिति हे गठन यानाः विरोध यानाच्वंगु दु । येँ महानगरपालिकां फैसलाया समर्थन याःगुलिं महानगरपालिका व मेयर बालेन साहया नं कडा विरोध जुयाच्वंगु दु ।
सरकारं तःगु पुनरावलोकनयात कयाः कंस सर्वोच्चय् छलफल जुयाः थुकियात कयाः पेशी न्ह्याकेगु लाकि मन्ह्याकेगु धकाः निर्णय जुइगु खँ धाःगु दु । यदि पेशी न्ह्याकेगु धकाः निर्णय जुल धाःसा थुकियात कयाः कानुनी सुुनुवाइ नं न्ह्याना वनी । पेशी मन्ह्याकेगु निर्णय जुल धाःसा सर्वोच्चया फैसला स्वतः खारेज जू वनीगु खँ धाःगु दु । फैसला खारेज याकेमाः धइगु माग यासें मंसिर ६ गते सुथय् ९ बजे कोपुण्डोलया ताँ क्वय् मुनाः प्रदर्शन यायेत्यंगु खः । ‘सर्वोच्च मार्चपास’ नां तयातःगु उगु प्रदर्शन कोपुण्डोलं शुरु जुयाः सर्वोच्च अदालतपाखे न्ह्याइगु खँ ग्वसाः खलःया नायः सुमन साय्मिं कनादीगु दु ।
थ्वहे झ्वलय् येँ महानगरपालिकां वंगु शुक्रवाः गौशालाय् गैरकानुनी ढंगं डोजर चले यानाः छेँ थुनेत स्वःगु खँयात नं साय्मिं विरोध यानादीगु दु । वकुन्हु महानगरपालिकां हःगु डोजरया न्ह्यःने ग्वारातू वन धकाः साय्मियात लछारपछार यानाः ज्वना यंकूगु खः । साय्मिं कनादीकथं गौशालाया उगु लागा महानगरपालिका अन्तर्गत मलाःसां नं डोजर चले यानाः छेँ थुनेत्यंगु कारणं विरोध यायेमाःगु खः । स्थानीय मनूतय्सं उगु थाय्या मापदण्ड बारे सर्वोच्च अदालतं याःगु फैसलाया पूर्ण पाठ वयेवं थःपिंसं उकिया पालना याये धायेक धायेकं हे मनपां डोजर चले याःगु खः । डोजर चले यानाः छेँ थुनेगु लागिं थःपिनि नामय् च्वयातःगु पूर्जी हजि धकाः माग याःसां नगर प्रहरीतय्सं पूर्जी मदु, थ्व मनपाया ठाडो आदेश खः धकाः छेँ थुनेत स्वःगु खः । अभियन्ता साय्मिं मनपाया थ्व ज्यायात ‘बर्दी पुनाः याःगु गुण्डागर्दी’ धकाः द्वपं बियादीगु दु ।
थ्वहे झ्वलय् खुसि सिथय् ४० मिटर त्वःतेमाःगु सर्वोच्चया फैसलायात कयाः भूमि अधिकार संघर्ष समितिं नेवाःतय् थीथी जातीय खलः पुचःलिसे सहलह ब्याकूगु दु । सर्वोच्चं याःगु थ्व फैसला छु खः व थुकिं स्थानीय नेवाःतय्त गज्याःगु लिच्वः लाकी धकाः अन सहलह जूगु खः । संघर्ष समितिया नायः श्यामकृष्ण प्रजापतिं कनादीकथं सर्वोच्च अदालतया फैसलाय् २०२१ सालया नापी कथं खुसिया किनारा कायम यानाः अनंनिसें ४० मिटर कायेगु धकाः च्वयातःगु दु । यदि ०२१ सालया नापी कथं खुसिया सिथ कायम यानाः ४० मिटर काल धाःसा आः बिचाः यानातःगु सिबें अझ हे यक्व जग्गा अधिग्रहण जुइगु खँ वय्कलं कनादीगु दु ।
LEAVE YOUR COMMENTS