ज्ञानमाला भजनया विकास व विस्तार विषयय् अन्तक्र्रिया

यल – नेपाल राष्ट्रिय ज्ञानमाला समितिया ग्वसालय् ज्ञानमाला भजनया विकास व विस्तार विषयय् यल जिल्लाव्यापी अन्तक्र्रिया ज्याझ्वः जुल । २५६३ क्वःगु स्वांयाःपुन्हिया लसताय् जूगु उगु अन्तक्र्रिया ज्याझ्वः शाक्यसिंह विहार थैनाय् जूगु खः ।समितिया केन्द्रीय नायः रमना श्रेष्ठया सभापतित्वय् जूगु ज्याझ्वलय् विहार प्रमुख भिक्षु चन्द्रगुप्त महास्थविर मूपाहांकथं बिज्याःगु खः ।

ज्याझ्वःया सभापतिलिसें समितिया केन्द्रीय नायः श्रेष्ठं लसकुस यासें ज्ञानमालाया विकासया निंतिं सकलें छधी छप्पँ जुयाः न्ह्याः वनेमाःगु खँय् बः बियादिल । लिसें वय्कलं ज्ञानमाला भजन हालेबलय् सुर, ताल व सःयात नं ध्यान बिया वनेमाः धयादिल ।

समितिया मूछ्यांज्ये इन्द्रमुनी शाक्यं ज्याझ्वःया उद्देश्यलिसें ज्ञानमाला भजन स्थापनाकालंनिसें थौंतक जुयाच्वंगु खँयात सक्षिप्त जानकारी बियादीगु ज्याझ्वलय् प्रज्ञानन्द स्मृति ज्ञानमाला भजन खलःपाखें लसकुस म्येँ न्ह्यब्वःगु खः ।

यल जिल्लाया झिंन्हय्गू ज्ञानमाला भजन खलः, पुचः व संघं ब्वति काःगु ज्याझ्वलय् ललितपुर क्षेत्रीय उप समितिया सल्लाहकार प्रा. डा. वज्रराज शाक्यं थेरवादीपाखें भजन जुया वयाच्वंगुलिं महायानपाखें तुतः, नामसंगीति, स्त्रोत पाठयात नं संगीतवद्ध यानाः हालेगु यायेमाः धयादिल ।

समितिया संरक्षक प्रा. सुवर्ण शाक्यं अन्तक्र्रिया ज्याझ्वलय् थःगु विचाः प्वंकेगु झ्वलय् थुकथंया अन्तक्र्रिया ज्याझ्वः जूगुयात कयाः च्वछायादिल । समितिया मध्यमाञ्चल उपाध्यक्ष जुलुम शाक्यं सुभाय् देछानादीगु ज्याझ्वः पुण्यानुमोदन यासें क्वचायेकूगु खः ।