‘कुमारी’ उपन्यास विमोचन
येँ (नेपालभाषा टाइम्स)- वरिष्ठ साहित्यकार मल्ल के सुन्दरया उपन्यास ‘कुमारी’ पिदंगु दु । कुमारी सालीगु न्हि क्वःने याःकुन्हु हे लाकाः बिहिवाः छगू ज्याझ्वःया दथुइ पुलांपिं न्याम्ह कुमारी माजुपिनि ल्हातं उपन्यासया विमोचन जूगु खः ।
साहित्यकार निरञ्जनरत्न शाक्यया सभापतित्वय् जूगु ज्याझ्वलय् विमोचन जूगु उपन्यासया बारे न्ववानादिसें नेपालभाषा टाइम्सया सम्पादक सुरेश किरणं थ्व सफू मात्र उपन्यास जक मखसे छगू इतिहास नं जूगु खँ धयादिल । थुगु उपन्यास च्वयेगु निंतिं च्वमिं कुमारीया ऐतिहासिक पृष्ठभूमिया यक्व हे अध्ययन अनुसन्धान यानाः च्वयातःगु खँ न्ह्यथँसें वय्कलं धयादिल ‘थ्व उपन्यास जक मखु, थ्व उपन्यास ब्वनाः कुमारीयागु इतिहास छु खः ले, कुमारीया संस्कृति गनं सुरु जुल धयागु नं सीके फइ ।’
उपन्यास पिकाःगु संस्था एड जोन प्रा.लि.या कजि सुजीव वज्राचार्यं लसकुस यानादीगु ज्याझ्वलय् उपन्यासयात कयाः वरिष्ठ समालोचक डा. ज्योतिप्रभा तुलाधरं समीक्षा यानादीगु खः । ज्याझ्वलय् वय्कलं कुमारी नेपाःया देवी जक मखसे नारीशक्तिया नं छम्ह तःधंम्ह देवी खः धासें नारी सशक्तिकरणयात महत्व बियाः च्वयातःगु थ्व उपन्यास अन्तर्राष्ट्रियस्तरय् चर्चा यायेबहःगु उपन्यास जूगु खँ धयादिल ।
अथेहे वय्कलं कुमारी धायेबलय् अन्तर्राष्ट्रिय रुपं हे जयप्रकाश मल्ल व तलेजुलिसे स्वानाच्वंगु बाखं जक प्रचारय् वयाच्वंगुलिइ थ्व उपन्यासं व स्वयां न्ह्याः वनाः गुणकामदेवया पालय् निसें नारी शक्तिया देवी जुयाच्वंम्ह कुमारीयाबारे महत्वपूर्ण पक्षयात न्ह्यब्वःगु खँ धयादिल ।
अथेहे उपन्यासकार मल्ल के सुन्दरं कुमारी माजु नेपाःया धार्मिक, सामाजिक सद्भावया प्रतीक नं जूगु खँ कनादिसें धयादिल, ‘बौद्धया म्ह्याय्मचा कुमारी जुइ, वसपोलयात शाक्तपिंसं अजिमाया रुपं हनाच्वनी, अले शैव वैष्णवतय्सं तन्त्रया द्यः कथं हनी । उकिं कुमारी माजु झीगु देय्या धार्मिक सद्भावया प्रतीक नं खः ।’
ज्याझ्वलय् सञ्चारकर्मी सुरजवीर वज्राचार्यया सलय् उपन्यासया छगू ब्व ब्वनाः नं न्यंकूगु खः ।
LEAVE YOUR COMMENTS