राष्ट्रपतिपाखें संघीय समाजवादी पार्टीलिसे सहलह

येँ (नेपालभाषा टाइम्स)÷ राष्ट्रपति रामचन्द्र पौडेलं वर्तमान राजनीतिक परिस्थितियात कयाः थीथी राजनीतिक दलतलिसे सहलह यायेगु झ्वलय् म्हिगः संघीय समाजवादी पार्टीलिसे खँल्हाबल्हा याःगु दु । म्हिगः राष्ट्रपति पौडेलं संघीय समाजवादी पार्टी नेपालया संघीय अध्यक्ष राजेन्द्र श्रेष्ठ व उपाध्यक्ष रत्नध्वज कन्दङ्वालिसे सहलह यानादीगु खः । सहलहया झ्वलय् राष्ट्रपति पौडेलं वर्तमान राजनीतिक परिस्थिति व चुनावय् वनेगु बारे न्यने कने यानादीगु खँ संघीय अध्यक्ष श्रेष्ठं कनादिल ।
सहलहया झ्वलय् अध्यक्ष श्रेष्ठं जेनजी आन्दोलन लिपा ब्वलंगु विषम परिस्थितिइ राष्ट्रपति पौडेलपाखें संविधान दुने च्वनाः सेफ ल्यान्डीङ यानादीगु धासें पौडेलया प्रसंशा यानादीगु खः । थ्व झ्वलय् वय्कलं थःपिं चुनावय् वनेत तयार दुगु व सरकारं क्वःछिनातःगु इलय् चुनाव यायेमाःगु खँ धयादीगु खः ।
वय्कलं निर्वाचन उखेथुखे जुल धाःसा संवैधानिक समस्या ब्वलनीगु खँ धासें घोषित इलय् हे निर्वाचन यायेगु निंतिं सरकारं पलाः न्ह्याकेमाःगु खँ धयादीगु खः । थ्व झ्वलय् वय्कलं संविधान कथं खुलाया दुने संसद च्वनेमाःगु व्यवस्था दुगुलिं घोषित इलय् चुनाव मजुल धाःसा संसद् हाकनं पुनस्र्थापना जुया वयेफुगु धासें थज्याःगु अवस्था मवयेकेत इलय् हे चुनाव यायेत बः बियादीगु खः ।

नेपालभाषा टाइम्स

च्वमिया मेमेगु

• बोस्टनय् सक्वया सम्पदाया चित्रकला ब्वज्या
• एनपीपीएया नायः पदय् शान्ति श्रेष्ठ
• समाजसेवी दिलबहादुर मानन्धर मंत
• शंखधरया लुँ व लोककल्याण
• इलाछेँय् च्याःगु मि नियन्त्रणय्, प्यखा छेँ व देगः ध्वस्त