ढुंगानाया राजकीय सम्मानसाथ अन्त्येष्टी

येँ (नेपालभाषा टाइम्स)- पुलांम्ह सभामुख लिसें मानव अधिकारवादी नेता दमननाथ ढुंगानाया म्हिगः पशुपति आर्यघाटय् राजकीय सम्मानसाथ अन्त्येष्टि याःगु दु ।
वय्कःया काय्पिं निमेष व निशेषं सीम्हय् मि तःगु खः । उगु इलय् नेपाली सेनां सलामी बिसें शोक धुन पूगु खः । ८३ दँ दुम्ह ढुंगाना स्येँला सम्बन्धी समस्याया वासः यायेगु झ्वलय् अस्पतालय् मदुगु खः ।

अन्त्येष्टि न्ह्यः वय्कःया पार्थिक शरीरयात अन्तिम श्रद्धाञ्जलि बीत येँया सानो गौचरनय् तःगु खः । अन प्रधानमन्त्री केपी ओलीं राष्ट्रिय ध्वाँचं फायेकाः श्रद्धाञ्जली देछाःगु खः । मदुम्ह ढुंगानायात श्रद्धाञ्जली बीत पुलांम्ह राष्ट्रपति रामवरण यादव, नेपाली कांग्रेसया सभापति शेरबहादुर देउवा, नेकपा माओवादी केन्द्रया अध्यक्ष पुष्पकमल दाहाल, नेकपा एसया अध्यक्ष माधव नेपाल, जसपाया उपेन्द्र यादवपिं थ्यंगु खः ।

ढुंगाना मदुगुलिं म्हिगः सरकारं सार्वजनिक बिदा नं बिउगु खःसा सरकारी ज्याकू, विदेशस्थित दूतावास व नियोगं राष्ट्रिय ध्वाँय् बछि ध्यचुइकूगु खः ।