‘१०० फिट थ्यंकाः जहाज थहां हे मवन’

येँ (नेपालभाषा टाइम्स)÷सौर्य एयरलाइन्सया जहाज दुर्घटनाय् लानाः सिनामंगलस्थित केएमसी अस्पतालय् वासः याकाच्वंम्ह क्याप्टेन मनिषरत्न शाक्यं जहाजयात थम्हं नियन्त्रण याये मफुगु खँ केएमसीया मेडिकल डाइरेक्टर डा. मिना थापायात कनादीगु दु ।

डा. थापायात शाक्यं कनादीगु दु, ‘थ्यंमथ्यं १०० फिट च्वय् थ्यनेधुंकाः अनं च्वय् यंके मफुत । क्वय् कुतुं वल । वयां लिपा जहाज जिगु नियन्त्रणय् मन्त । छक्वलं ल्हाःगु थें अनुभव जुल । चिप्वाःगु प्वालं थः हे पिहां वया । अनं पिहां वयाबलय् सुनां जितः सालाकाःगु थें लुमं ।’

म्हीग सुथय् ११ः११ बजे पोखराया नितिं ब्वःगु विमान त्रिभुवन अन्तर्राष्ट्रिय विमानस्थलय् दुर्घटना जूगु खः । उकी लानाः झिंच्याम्ह सीगु खःसां क्याप्टेन शाक्ययात धाःसा उद्धार याःगु खः । वय्कःया न्हाय्या क्वँय् व बपिक्वँय् छपु त्वःधूगु दु । फुक्क स्वास्थ्य परीक्षण धुंकाःलि वय्कःया स्वास्थ्य खतरामुक्त जूगु खँ डाक्टरतय्सं धाःगु दु । क्याप्टेन शाक्य येँया असं बहाःयाम्ह खः ।

सीपिं मनूतय् लाश पोष्टमार्टमं म्हसीकाः जक पित बीगु खँ धाःगु दु ।