एमसीसी प्रक्रियां हे क्वचायेकीगु

येँ – माओवादी अध्यक्ष पुष्पकमल दाहालं एमसीसीया विवाद प्रक्रियां हे क्वचाइगु खँ धयादीगु दु । म्हिगः माओवादी संसदीय दलया ज्याकुथिइ कांग्रेसया वरिष्ठ नेता रामचन्द्र पौडेललिसे खँ ल्हासें वय्कलं थ्व खँ धयादीगु खः ।

कांग्रेस नेता पौडेलं एमसीसी समस्या ज्यंकेत व गठबन्धन ल्यंकेत अध्यक्ष दाहालयात इनाप यानादीगु खः । थःपिनि खँल्हाबल्हायात कयाः दाहालं धयादिल, ‘वय्कलं मेगु खँ मखु, गठबन्धन ल्यंकेमाः, एमसीसी समस्या समाधान जुइमाल धयादीगु खः, जिं गठबन्धन नं ल्यनी, एमसीसी नं प्रक्रियां हे क्वचाइ धया ।’

मेखे सत्ता गठबन्धनय् दुथ्याःगु नेकपा (एसं) एमसीसीया विपक्षय् मतदान यायेगु निर्णय याःगु दु । थ्व स्वयां न्ह्यः नं एमसीसीया विपक्षय् मतदान यायेगु निर्णय याःगु नेकपा एसं याःगुखः । माओवादी केन्द्रं नं एमसीसीया विपक्षय् च्वनेगु खँ धाःगु खः ।

उकथं हे नेपाली कांग्रेसयात नेता पौडेलं एमसीसीया विषय सडकं सदनय् दुहां वंगुलिं थ्व विषयं आः राष्ट्रया ध्यान संसदपाखे केन्द्रित जूगु खँ धयादीगु दु । नेता पौडेलं संघीय संसदय् प्रतिनिधित्व याइगु राजनीतिक दलया नेतातलिसे एमसीसीया सम्बन्धय् सहलह यानाः मंकाः धारणा दयेकेत थः क्रियाशील जुयाच्वनागु धासें एमसीसी बारे आः वास्तविक रुपय् सदनय् सहलह जुइगु खँ धयादीगु दु ।

जनता समाजवादी पार्टीया अध्यक्ष उपेन्द्र यादवलिसे सहलह लिपा सञ्चारकर्मीपिंत प्रतिक्रिया बिसें नेता पौडेलं धयादिल, ‘एमसीसीया विषयसं खँ ल्हायेबलय् अन्तर्राष्ट्रिय सम्बन्ध व विकासया अवस्था छु जुइ धइगु बारे गहन रुपं खँ ल्हानागु दु, सैद्धान्तिक रुपय् जिमिगु दथुइ मतभेद छुं खने मदु, तर छुं प्राविधिक विषय नं दु ।’

उकथं हे नेता पौडेलं देय्लिसे स्वानाच्वंगु महत्वपूर्ण विषय एमसीसी बारे संसदय् दुगु फुक्कं राजनीतिक दलया नेतातलिसे थम्हं खँल्हाबल्हा न्ह्याकागु धासें थःपिनिगु पुस्ता असफल पुस्ताय् परिणत जुयाः देय् संकटपाखे वनिगु खःला धइगु चिन्ता जुयाः हे नापलायेगु ज्या यानाच्वनागु खँ नं वय्कलं धयादीगु दु ।

उकथं कांग्रेस प्रवक्ता विश्वप्रकाश शर्मां एमसीसीपाखे लिफः मस्वयेगु खँ धयादीगु दु । म्हिगः ग्वसाः ग्वःगु पत्रकार सम्मेलनय् प्रवक्ता शर्मां एमसीसी अनुदान सहयोग खः धासें लिफः मस्वयेगु खँ धयादीगु खः ।

एमसीसी विरुद्ध रिट
प्रतिनिधिसभाया बैठकय् पेश जूगु एमसीसी सम्झौता न्ह्यःने मन्ह्याकेत माग यासें सर्वोच्च अदालतय् रिट निवेदन पेश जूगु दु । वरिष्ठ अधिवक्ता डा. सुरेन्द्र भण्डारीं म्हिगः सर्वोच्च अदालतय् रिट पेश याःगु खः । रिट निवेदनय् डा. भण्डारीं नेपाल सन्धी ऐन २०४७ या दफा ४ कथं प्रतिनिधिसभाय् एमसीसीया प्रक्रिया न्ह्यःने मन्ह्याकेत माग दावी यानादीगु दु ।

सम्बन्धित बुखँ

LEAVE YOUR COMMENTS