उपमेयर कप एकायन कराते क्वचाल
येँ (नेपालभाषा टाइम्स)- निन्हुयंकं जूगु उपमेयर कप एकायन करातेय् मिजंतय् खुल्ला तौल समूहय् दिनेश बम न्हाप लाःगु दुसा मिसातय् खुल्ला तौल समूहय् अन्जना बुढाथोकी न्हाप लाःगु दु । येँया लैनचौर स्थित टेबलटेनिस हलय् निन्हुयंकं जूगु धेंधेंबल्लाखय् मिस्तय् पाखे ३५ केजीइ रेखा रोकाया, ४० केजीइ सिवानी आलेमगर, ४५ केजीइ कृपा खड्का, ५० केजीइ रेश्मीला राई, ५५ केजीइ निषा तामाङ न्हाप लाःगु खः ।
अथेहे मिजंतय् पाखे ३५ केजीइ अरुणा लामा, ३० केजीइ विवेश जैसी, ३५ केजीइ गणेश विष्ट, ४० केजीइ प्रविन श्रेष्ठ, ४५ केजीइ सुवास शाही, ५० केजीइ पवन तामाङ व ५५ केजीइ विराज मगर न्हाप लाःगु खः ।
येँ महानगरपालिकाया सहकार्यय् नेपाल एकायन करोत संघया ग्वसालय् जूगु धेंधेंबल्लाखय् त्याःपिंत मू पाहाँ येँ महानगरपालिकाया उपमेयर सुनिता डंगोलं सिरपाः कथं पदक, नगद, प्रमाणपत्र लःल्हानादीगु खः । ज्याझ्वलय् न्ववानादिसें उपमेयर डंगोलं कासा ख्यलय् ग्वाहालि याये दयाः थःपिं लय्ताःगु खँ न्ह्यथनादिसें धेंधेंबल्लाखय् सहभागी सकलें लिसें ग्वसाः खलःयात सुभाय् देछायादिल ।
धेंधेंबल्लाखय् न्हाप लाःपिंत म्हतिं नीद्वः तका लिसें स्वर्ण पदक व दसिपौ बिउगु खःसा ल्यू लाःपिंत म्हतिं झिंनिद्वः तका लिसें रजत पदक व दसिपौ, लियांल्यू लाःपिंत म्हतिं न्हय्द्वः तकालिसें कास्य पदक व दसिपौ, अथेहे सान्त्वना लाःपिंत पदक व दसिपौ लःल्हाःगु खः ।
LEAVE YOUR COMMENTS