नेपाः मिसा टी–२० विश्वकप छनोटया सेमिफाइनलय्

येँ (नेपालभाषा टाइम्स)÷ नेपाः आइसिसी मिसा टी–२० विश्वकप एसिया छनोटया सेमिफाइनलय् थ्यंगु दु । सोमवाः मलेसियाया ओभलय् जूगु कासाय् नेपालं कतारयात बुकाः सेमिफाइनलय् थाय् दयेकूगु खः । झ्वःलाक प्यंगूगु कासा त्याकेगु झ्वलय् नेपालं कतारयात ९ विकेटं बुकूगु खः ।

टस त्याकाः नेपालं न्हापां बलिङ याःगु खः । नेपालं कतारया निर्धारित २० ओभरय् ७ विकेटया क्षतिइ मुक्कं ७४ रन सीमित यानाबिउगु खः । नेपाःया निंतिं इन्दु वर्मां प्यंगू ओभर बलिङयासे मुक्क १० रन बियाः स्वंगू विकेट काःगु खः । अथेहे पुजा महत्तो व कविता कुँवरं छगू छगू विकेट काल । कतारया साची धडवालं २१ व एन्जिलेने मारें १४ रन दयेकूगु खः ।

कतारं बिउगु ७५ रनया लक्ष्य नेपालं छगू विकेटया क्षतिइ १०.३ ओभरय् पूवंकूगु खः । नेपाःया ओपनर काजल श्रेष्ठं ३२ रन, इन्दु वर्मां २० रन व सीताराना मगरं १७ रन दयेकूगु खः ।

धेंधेंबल्लाया न्हापांगु कासाय् नेपालं मलेसियायात न्यागू रन, निगूगु कासाय् बहराइनयात १० विकेट व स्वंगूगु कासाय् भुटानयात ७ विकेटं बुकूगु खः ।

नेपालं आः अन्तिम कासा युएइलिसे म्हितीइ । थ्व पुचलं युएइं नं सेमिफाइनलय् थाय् दयेकेधुंकूगु दु । नेपाः व युएइया कासां समुह विजेता निर्धारण याइ । सेमिफाइनल कासा भदौ २१ गते जुइ । फाइनल भदौ २२ गते जुइ ।