थनिंनिसें जर्मनीइ फुटबल

म्युनिख (एजेन्सी) – बोर्सिया डर्टमन्डं थ:गु घरेलु मैदानय् फुटबल म्हितेमा:, उगु कासा स्वइपिनि ल्या: न्ह्याब्लें ८० द्वया ज:ख: जुयाच्वनी । थौ शनिवा: व हे डर्टमन्डं बुंडेसलिगाय् साल्का ०४ या सामना यायेत्यंगु दु । थ्व ला डर्बी कासा नं ख: । व हे डर्टमन्डया रंगशालाय् स्वकुमित धा:सा छम्ह नं दइमखु । तर पूरा विश्व धा:सा व हे लिग स्वयेत आय्बुया च्वंगु दु ।

थनिंनिसें हे जर्मनीय फुटबल औपचारिक ल्याखं लिहाँ वये त्यंगु दु, अले कोरोना भाइरस संक्रमणया महामारी दथुइ फुटबल जुइत्यंगु जर्मन प्रमुख युरोपेली देय् नं जुइत्यंगु दु । जर्मन फुटबल संघं लिग न्ह्याकेगु झ्वलय् सरकारं लागू याना त:गु सकतां सावधानीया नियम धा:सा क्वातुक पालना याइगु जुइ ।

गथेकि कासामितय्सं म्हितिबलय् म्हुतुइ मास्क तया तयेमा:, गोल जुल धका: लयतायेगु झ्वलय् न्हापा थें थ:थवं घयेपुइगु नं याये दइमखु । फुटबल यायेगु झ्वलय् थथे याये ज्यु व थथे याये मज्यु धका: यक्वं नियम तयेका: त:गु दु । कासा बन्द रंगशालाय् जुइत्यंगु जुसां जर्मन फुटबलय् रुचि तइपिं धा:सा झन यक्व: जुयाव:गु दु ।

युरोपय् मेगु प्रमुख फुटबल देय्त इंग्ल्यान्ड, स्पेन व इटालीइ आ: तकं फुटबल गुब्ले सुरु जुइ धका: निश्चित जुइमफूगु स्थितिइ आ: जुइथ्यंगु बुंडेसलिगाया महत्त्व व प्रभाव यक्व खनेदूगु ख: । लिगया ल्या धलखय् बायर्न म्युनिख न्हापांगु थासय् दुसा वया ल्युने डर्टमन्ड हे दु । अथेतुं लेपजिप स्वंगूगु थासय् दु ।