राज्य बल्लाकेत भाषा व संस्कृतिया संरक्षण जुइमाः – सञ्चार मन्त्री

येँ (रासस)- सञ्चार व सूचना प्रविधि मन्त्री पृथ्वी सुब्बा गरुङं राज्ययात शक्तिशाली दयेकेत भाषा व संस्कृतिं तःधंगु भूमिका म्हितीगु जूगुलिं थुकिया संरक्षण यायेमाःगु खँ धयादीगु दु ।

राष्ट्रिय समाचार समिति (रासस) पाखें न्ह्याकूगु नेपाल भाषा व मैथिली भाषाया समाचार सेवाया औपचारिक शुभारम्भ यासें मन्त्री गुरुङं सरकारं भाषा संरक्षण अभियान सरकार मातहतया सञ्चार माध्यमपाखें न्ह्याकूगु प्रष्ट यानादिल ।

फुक्कं क्षेत्रया जनताया नितिं साझा व समान अधिकार बाँडफाँड यायेगु ज्यां राष्ट्रियता प्रवद्र्धन यायेफइ धासें वय्कलं धयादिल – “भ्वँतय् जक मखु जनताया ख्वाःपातय् भाषा व संस्कृतिइ राष्ट्रियता व समावेशी प्रजातन्त्र खने दयेमाः ।”

सभ्य, समृद्ध व अखण्ड समाज निर्माण यायेगु अभियानय् थज्याःगु ज्या न्हापांगु पलाः कथं कायेमाःगु बिचाः प्वंकुसे नेपाः सरकारया प्रवक्ता गुरुङं सरकारया सच्छि न्हुया ज्याझ्वलय् लानाच्वंगु राससं न्हिछिचच्छि मदिक्क समाचार सेवा बीगु, संग्रहालय पलिस्था यायेगु व निगू मांभासं समाचार सेवा न्ह्याकेगु जिम्मेवारीयात राससं ताःलाकूगु धासें च्वछायादिल ।

मन्त्रालयया सचिव राधिका अर्यालं नेवाः व मैथिली भासं समाचार पितबीगु राससया ज्यां उगु समुदायं थःपिनि आत्मसम्मान व गौरब थकाःगु अनुभूति याइगु भलसा प्वंकादिल ।

राससया नायः धर्मेन्द्र झानं भाषा व मिडिया छगू मेगुया नितिं पूरक खः धासें राष्ट्रया बृहत्तर हित स्वयाः ज्या याइपिं गबलें बुइमखु धयादिल । राससया महाप्रवन्धक सिद्धराज राईं नागरिकया सूचनाया हक स्थापित यायेगु ज्याय् राससं ताँपुया भूमिका म्हिताच्वंगु दु धयादिल ।

भाषा आयोगया दुजः सुरेश किरण मानन्धरं सरकारी सञ्चारमाध्यमपाखें बहुभाषाय् समाचार सम्पे्रषण जुइगु थीथी भाषाभाषी व जातीय समुदायया लागि गौरवया खँ खः धयादिल । मैथिली भाषाविज्ञ प्रा डा योगेन्द्र प्रसाद यादवं छुं नं भाषायात ल्यंकातयेगु खःसा उकिया छ्यलाबुला जुयाच्वनेमाः धयादिल ।

सम्बन्धित बुखँ

LEAVE YOUR COMMENTS