बौद्धमय याइन सिद्धार्थनगर नगरपालिका

येँ – रुपन्देही जिल्लाया सिद्धार्थनगर नगरपालिकायात बुद्धमय क्षेत्र दयकेगु लागिं नगरपालिकां पहल शुरु याःगु दु । गौतम बुद्ध जन्म जूगु लुम्बिनी वनेगु मू क्षेत्र जूगु कारणं अन थ्यनेवं हे बौद्ध वातावरण पिलुइमा धकाः थ्व अभियान न्ह्याकागु खँ सिद्धार्थनगर नगरपालिकाया मेयर हरिप्रसाद अधिकारीं कनादिल ।

थुकिया लागिं नगरपालिकाया मू सतकया थीथी थासय् भगवान बुद्धया मूर्ति तयेगु ज्या न्ह्याकूगु दु । थौंकन्हय् भैरहवाया मूल सतकया दथुइ च्वंगु डिभाइडरय् बुद्धया मूर्ति तयेगु ज्या याःगु दु । थुकिया नापं बुद्धचोकंनिसें निर्माणाधीन गौतम बुद्ध अन्तर्राष्ट्रिय विमानस्थलया टर्मिनल भवनया न्ह्यःने तक १९ गू बुद्ध मूर्ति तयेगु ज्या नं न्ह्याकूगु दु । अन मुक्कं यानाः १९ गू बुद्धया मूर्ति तयेगु ग्वसाः दु ।

अन बुद्धया मूर्ति तयेगु लागिं लुम्बिनी प्रदेश सरकारया पर्यटन मन्त्रालयपाखें ७५ लाख तकाया बजेट विनियोजन याःगु खः । अथे हे थगुने सिद्धार्थनगर नगरपालिकापाखें नं बुद्धया मूर्ति तयेगु लागिं ४६ लाख तका बजेट विनियोजन याःगु खः ।

अन तइगु बुद्धया मूर्ति यलय् दयेकातःगु खःसा यलं हे न्याना यंकूगु मूर्ति अन पलिस्था याःगु खः । म्हासुगु रंगया थ्व बुद्धया मूर्ति धातु निर्मित खः ।

सिद्धार्थनगर नगरपालिकां बेलहिया नाकाय् बौद्ध पह खने दुगु छगू ध्वाखा दयेकेगु नं तयारी यानाच्वंगु दु । खास यानाः भारतं नेपाः दुहां वइपिं अप्वः यात्रुत थ्वहे नाका जुयाः वइगु जूगुलिं नेपाः थ्यनेवं हे बौद्ध वातावरण पिलुइमा धकाः थ्व ग्वसाः यानागु खँ नगरपालिकां धाःगु दु ।