एमाले पार्टी पुचः दिल्ली भ्रमणय्

येँ -प्रधानमन्त्री केपी ओलीं थ्वहे चैत महिनाया अन्तिम वालय् यानादीत्यंगु भारत भ्रमणया तयारी यायेगु लागिं एमालें पार्टीगत पहल नं शुरु याःगु दु ।

प्रमया भारत भ्रमण तय यायेगु लागिं सरकारीस्तरपाखें तयारी याये न्ह्यः हे एमालें पार्टीगत रुपं तयारी न्ह्याकूगु खः । उकिया लागिं आः नकतिनि एमाले पार्टी कार्यालयया छगू पुचः राजधानी न्हूदिल्ली वनाः अनया थीथी नेतात नापलायेगु ज्या जूगु खः ।

पार्टीया सचिव योगेश भट्टराई, कार्यालय सचिव कृष्णगोपाल श्रेष्ठ लिसें मेपिं दुजःत दुथ्याःगु उगु पुचलं न्हूदिल्ली वनाः सत्तारुढ पार्टी भारतीय जनता पार्टीया वरिष्ठ नेतातय्त नापलानाः प्रमया भारत भ्रमणयात सफल यायेगु बारे खँल्हाबल्हा याःगु खः ।

एमालेया थ्व भ्रमण धुंकाः आः भाजपाया नं अज्याःगु हे छगू पुचः नेपाः वयेगु खँ जूगु जानकारी नं भ्रमण दलय् दुथ्याःम्ह छम्ह दुजलं ‘नेपालभाषा टाइम्स’ यात कनादिल ।

भ्रमण पुचलं दिल्लीइ भारतीय कम्युनिष्ट पार्टीया नेता लिसें नेपाःया मित्र सिताराम यचुरीयात नं नापलाःगु खः । यचुरी नेपाःया बारे यक्वं खँ सिउम्ह नं नेपाः–भारत दथुइ छुं संकट वल धाःसा सहजकर्ता जुयाः ज्या समेत यानादीम्ह नेता खः । नेपालय् वामपन्थी सरकार वयेत्यंगु सन्दर्भय् एमालें भारतय् थः मित्रशक्तिलिसे स्वापू बांलाका तयेमाः धकाः थ्व सम्पर्क तयेगु ज्या जूगु खँ नं सूत्रं धाःगु दु ।

प्रम ओलीया आः जुइगु भारत भ्रमण लिपा निगू देय् जक निगू पार्टी दथुया स्वापू समेत सुमधुर जू वनीगु आशा यानातःगु दु ।