नेपालभाषा संकिपा संघया घोषणा

येँ (नेपालभाषा टाइम्स)- नेपालभाषा संकिपा संघया घोषणा जूगु दु । मंगलवाः येँय् छगू पत्रकार सम्मेलन यासें संघया घोषणा जूगु खः ।

नेपालभाषा ह्यःमि शान्तवीर सिं तुलाधरया संरक्षकत्वय् नीस्वंगु संघया अध्यक्ष हृदयप्रसाद मिश्र जुयादीगु दुसा न्वकु सुरेश किरण, छ्यांज्ये श्यामसुन्दर सिल्पकार, दांभरि अन्नपूर्णेश्वरी श्रेष्ठ व दुजः आर्यम नकःमि, शरद कसाः, पवित्र कसाः, कृष्णभक्त महर्जन व अर्नेश्वरी श्रेष्ठ शिल्पकार जुयादीगु दु ।

ज्याझ्वलय् न्ववानादिसें संघया संरक्षक तुलाधरं थःम्हं हिन्दी भाय् गथे न्ह्याम्हेसिनं नं न्ववानाच्वन धकाः बिचाः याना स्वयाबलय् थुकी फिल्मया यक्व भूमिका दुगु खनाः नेपालभाषा नं विकास यायेगु खःसा फिल्म दयेकेमाः धयागु वाःचायेकाः नेपालभाषाया संकिपा दयेकेगु निंतिं ग्वाहालि यायेगु कथं थ्व संघ नीस्वनागु खँ धयादिल ।

संघं नेपालभाषाया संकिपा दयेकीपिंत ग्वाहालि यायेगु निंतिं छगू कोष दयेकीगु खँ धाःगु दु । कोषय् म्होतिं नं निगू करोड दां मुंकाः उकिया ब्याजपाखें नेपालभाषाया संकिपा दयेकीपिंत ग्वाहालि यायेगु खँ पत्रकार सम्मेलनय् धाःगु दु ।

ज्याझ्वलय् बागमति प्रदेशया सांसदपिं हरिप्रभा खड्गी श्रेष्ठ, शैलेन्द्र वज्राचार्य, नेवाः देय् दबूया अध्यक्ष पवित्र वज्राचार्यपिंसं न्हूगु नीस्वंगु संघया भिंतुना देछायादीगु खः । अथेहे ज्याझ्वलय् सुपरस्टार नेवाः कलाकारतय्त नं सम्मान याःगु खः ।

सम्बन्धित बुखँ

LEAVE YOUR COMMENTS