बागमतीइ विश्वासया मत कायेगु तयारी

येँ – बागमती प्रदेशया मुख्यमन्त्री अष्टलक्ष्मी शाक्यं विश्वासया मत कायेगु निंतिं मतदान याकेगु तयारी यानादीगु दु । वय्कलं विश्वासया मत कायेगु निंतिं वइगु असोज २३ पाखे हे प्रदेश सभाया अधिवेशन सःतेगु तयारी यानादीगु खः ।

मुख्यमन्त्री शाक्यं विश्वासया मत कायेगु तयारी यानादीसां वय्कलं प्रदेश सभापाखें विश्वासया मत धाःसा कायेफइगु अवस्था आःतक मदुनि । बागमती प्रदेशय् विश्वासया मत कायेगु निंतिं म्होतिं नं ५५ म्ह सांसदतय् समर्थन माः । तर एमाले कुचा जुयाः एकीकृत समाजवादी पार्टी वयेधुंकाः शाक्यं विश्वासया मत कायेफइगु अवस्था मदुगु खः । एमाले कुचा जुइ न्ह्यः वंगु भदौ २ गते ५६ म्ह सांसदतय् समर्थनय् मुख्यमन्त्री जुयादीम्ह शाक्यया पक्षय् आः एमालेया ४३ म्ह सांसद जक दनि । एमालेया १३ म्ह सांसद एकीकृत समाजवादी वनेवं शाक्य अल्पमतय् लाःगु खः ।

बागमती प्रदेशय् प्रतिधिनित्व यानाच्वंगु विवकेशील साझा, राप्रपा, जनमोर्चा थेंज्याःगु चिचिधंगु पार्टीया समर्थनं नं विश्वासया मत कायेफइगु अवस्था मदुगुलिं शाक्यया सरकार क्वःदइगु हे अवस्था दु ।
आः बागमती माओवादी केन्द्रया २३ म्ह, नेपाली कांग्रेसया २२ म्ह व नेकपा एकीकृतया १३ म्ह सांसदतय् समर्थनय् गठबन्धन सरकार दयेकेगु तयारी जुयाच्वंगु दु ।

सम्बन्धित बुखँ

LEAVE YOUR COMMENTS