ने. सं. ११४६ बछलागा तृतीया -

खुसिबालय् मापदण्डया भ्रम

येँ (नेपालभाषा टाइम्स)-निन्हु लगातार वःगु वां यानाः खुसिबाः वयाः स्वनिगःया थीथी लागा डुबानय् लायेवं खुसि सिथय् थप २० मिटर थाय् त्वःतेमाः धकाः सर्वोच्च अदालतं बिउगु आदेश ठीक जू धाइपिंत अझ थप भ्रम न्यंकेगु अवसर चूलाःगु दु । उमिसं थौंकन्हय् सामाजिक सञ्जालय् लखय् डुबे जुयाच्वंगु छेँया किपा तयाः खुसि सिथय् माक्व थाय् मत्वःतूगु कारणं थथे जूगु धकाः भ्रम न्यंकेगु ज्या यानाहःगु दु । थुकी येँ महानगरपालिकाया मेयर बालेन साहं लहिनातःपिं छुं युट्यूबरत नं सक्रिय जुयाच्वंगु खने दया वःगु दु ।

तर थनया स्थानीय व पुलांपिं मनूतय्सं धाःसा थुगुसी खुसिबालं छेँ डुबे याःगुया कारण ४० मिटर मापदण्ड पालना मयाःगुलिं मखु धाःगु दु । थ्व खुसिबालं ४० मिटर सिबें तापाक च्वंगु छेँ–बुँ समेत डुबे याःगु कारणं मापदण्डलिसे थुकिया छुं स्वापू मदुगु खँ धाःगु दु ।

खुसिया मापदण्ड व सतक विस्तार विरुद्ध संघर्ष समितिया संयोजक सुमन साय्मिं थुगुसीया खुसिबाः धैगु बिचाः मयाःकथं वःगु दैवी प्रकोप जूगुलिं थुकियात ४० मिटर मापदण्डलिसे स्वायेगु पाय्छि मखु धयादीगु दु । थ्व खुसिबालं ४० मिटर सिबें तातापाक च्वंगु छेँ समेत डुबे याःगु कारणं ४० मिटर त्वःतूगु जूसा छेँ बचे जुइ धायेगु पाय्छि मजूगु खँ ‘नेपालभाषा टाइम्स’ यात कनादिल ।

स्वनिगलय् आप्रवासीत अप्वया वयेवं लाथेपाथे ढंगं छेँ दनेगु, खुसि चिब्या यानाः सतक दयेकेगु, खुसि सिथय् पार्क, फुटबल ग्राउण्ड थेंज्याःगु संरचना दयेकेगु थेंज्याःगु ज्या याःगुलिं बँय् लाइगु लः रिचार्ज मजुयाः सतह च्वय् बाः वःगु खँ वय्कलं कनादिल । उकिं स्वनिगलय् आः गुलि मनू तयेगु, गुलि गाडी झिके याके बीगु धकाः सीमा निर्धारण यायेमाःगु बिचाः नं वय्कलं तयादिल ।

थ्व खुसिबाःयात न्ह्यःने तयाः सर्वोच्च अदालतं आदेश बिउगु मापदण्ड ठीक जू धाये फइ मखु धासें वय्कलं धयादिल, ‘सर्वोच्चं धाःसां सरकारं उकिया मुआब्जा हे बी फइ मखु । उकिं मुआब्जा मबिसे जग्गा याना तयेगु मयासे तुरुन्त फुकुवा यायेमाः ।’

‘यदि मुआब्जा हे बी मफइगु खःसा छाय् जग्गा रोके यानाः जनतायात दुःख बीगु ?’ वय्कलं न्ह्यसः तयादीगु दु ।