नेपालयात त्वःता वःपिं नेतात हैरान

येँ -प्रमुख प्रतिपक्षी पार्टी नेकपा एमाले दुने माधव नेपालया साथ त्वःताः दुहां वःपिं नेतात लिसे नं पार्टी अध्यक्ष केपी ओलीया स्वापू बांलाइगु सम्भावना म्हो जुया वंगु खँ सीदुगु दु ।

अन्तिम अवस्थाय् नेपालया साथ त्वःताः एमालेय् वःपिं भीम रावल, अष्ट लक्ष्मी शाक्य, गोकर्ण बिष्ट, योगेश भट्टराई थेंज्याःपिं नेतातय्सं पार्टीयात २०७४ या फागुन २ गतेया अवस्थाय् यंकेत याःगु आग्रहयात ओलीं अस्वीकार याःगु जक मखु आः एमाले दुने माधव नेपालया नां हे काये मते धइथेंज्याःगु तकया खँ धया हयेवं थ्व झिम्ह नेता थारान्हूगु खँ सीदुगु दु । आः नकतिनि हे नं छगू सार्वजनिक ज्याझ्वलय् बागमती प्रदेशया मुख्यमन्त्री अष्टलक्ष्मी शाक्यं वरिष्ठ नेता माधव नेपालयात पार्टीइ दुहां झासँ धकाः याःगु इनापयात अध्यक्ष ओलीं खण्डन यासें आः एमालेय् माधव नेपालया आवश्यकता मदु धकाः लिसः बियादीगु प्रशंग चर्चाय् वयाच्वंगु दु ।

माधव नेपालया साथ त्वःता वःपिं नोतय्त आः तक एमालें पुलांगु जिम्मेवारी लित बिउगु मदुसा न्हूगु जिम्मेवारी नं बिउगु मदुनि । सूत्रं धाः कथं माधव नेपाल त्वःताः वःपिं थ्व नेतातय्त अध्यक्ष ओलीं आः तक नापं च्वनाः भलाकुसारी कथंया संवाद तकं याःगु मदुनि । अध्यक्ष ओलीपाखें याःगु थज्याःगु अपमानया कारणं थ्व नेतात पार्टी दुने निगूगु दर्जाया कार्यकर्ता जुयाः च्वने मालीगु अवस्था वयेफुगु आशंका याना हःगु दु ।

उखे एमाले त्वःताः एकीकृत समाज–वादी पार्टी दयेकादीम्ह नेता माधव नेपालं अन्तिम अवस्थाय् थःगु साथ त्वःता वंपिं थ्व नेतातय्त सुनां नं आलोचना याये मते धकाः थःगु पक्षया पत्रकारतय्त धयादीगु दु । त्वःता वंपिं वने हे धुंकल, आः उमित क्वह्यंकाः सुनां छुं च्वये मते धकाः वय्कलं इनाप यानादीगु खः ।

सम्बन्धित बुखँ

LEAVE YOUR COMMENTS