बौद्ध भजन प्रतिभा मालेज्या क्वचाल

येँ (नेपालभाषा टाइम्स) – बुद्ध शान्त पार्क निर्माण समितिया ग्वसालय् अनलाइनया माध्यमं नेपालभाषा व खय् भाय्या भजन प्रतिभा मालेगु ल्याखं जूगु ‘बुद्ध शान्त पार्क अनलाइन ट्यालेन्ट हन्ट’ क्वचाल । बौद्ध भजनया माध्यमं न्हूपिं प्रतिभा मालेगु ल्याखं जूगु उगु कासा अनलाइन माध्यमं जूगु दु ।

वंगु शुक्रवाः नेपालभाषाया विधाय् भजन प्रतिभा मालेगु ल्याखं जूगु कासाय् सुशील शाही न्हाप लाःगु दु। अथे हे मन्जिल शाक्य लिउ व प्रतिमा वज्राचार्यं लियांलिउ सिरपाः त्याकादिल । सिरपाः त्याकादीपिंत शहरी विकास राज्यमन्त्री रामवीर मानन्धरं ट्रफी, उद्योगपतिलिसें समाजसेवी धर्मबहादुर शाक्यं दसिपौ लःल्हानादीगु खः । न्हाप जुयादीम्ह शाहीयात समाजसेवी शाक्यं व्यक्तिगत रुपं न्याद्वः तका दां नं लःल्हानादीगु खः ।

नेपालभाषा विधाय् सछि व पीम्हेसिनं ब्वति काःगु खःसा थीथी चरण पार यानाः लिपांगु चरणय् थ्यंपिं झिम्हेसिया दथुइ टप टेनकथं प्रतिस्पर्धा जूगु खः । नेपालभाषा बुद्ध भजन प्रतिभा विधाय् दकलय् अप्वः एसएमएसपाखें मत कायेत सफल श्रृजना वज्राचार्य, अनु श्रेष्ठ, युट्युबय् दकलय् अप्वः भ्युअर्स वःम्ह मिनर्भा शाक्य व बबिता वज्राचार्ययात नं सिरपाः लःल्हाःगु खः ।

अथे हे वंगु शनिवाः खय् भाय्या विधाय् जूगु धेंधेंबल्लाः कासाय् अगिना तण्डुकार, रेशम थापा व कल्पना श्रेष्ठ छसिकथं न्हाप, लिउ व लियांलिउ लाःगु खः । कासाय् विजयी जुयादीपिंत मूपाहां शहरी विकास राज्यमन्त्री रामवीर मानन्धरं ट्रफी लःल्हानादीगु खःसा बौद्ध विद्वान प्रा. सुवर्ण शाक्यं दसिपौ लःल्हानादीगु खः ।

बौद्ध भजनया प्रतिभा मालेगु ल्याखं अनलाइनया माध्यमं जूगु कासाय् सछि स्वयां अप्वःसिनं ब्वति काःगु खः । ब्वति काःपिंमध्ये थीथी चरण पार यानाः लिपांगु चरणय् थ्यंपिं झिम्हेसिया दथुइ टप टेनय् दुथ्याकाः कासा जूगु खः । कासाय् दकलय् अप्वः एसएमएस भोटिङ प्राप्त यायेत सफल मन्दिरा वज्राचार्य, उर्मिला तुलाधर, युट्युबय् दकलय् अप्वः भ्युज वःपिं बबिता वज्राचार्य व मन्दिरा वज्राचार्ययात नं सिरपाः लःल्हाःगु खः ।

निगुलिं विधाया निर्णायकमण्डलय् संगीतकार दबल शाक्य, अनिल तुलाधर, वरिष्ठ म्येँ हालामि रमना श्रेष्ठ, लोककवि जभाई जकःमि, च्वमिलिसें वरिष्ठ निर्देशक पवन जोशी लगायत च्वनादीगु खः ।