‘व मनू, सु मनू ?’ सार्वजनिक
किपू(नेपालभाषा टाइम्स)- भारि कुबियाः थःगु जीवन यापन यानाच्वंम्ह छम्ह सामान्य मनूया जीवनयात कयाः निर्माण जूगु ‘व मनू, सु मनू ?’ म्युजिक भिडियो पिदंगु दु । मगन इन्टरटेनमेन्टया ग्वसालय् वंगु सोमवाः थनया कीर्तिपुर सिनेप्लेक्सय् जूगु ज्याझ्वलय् म्युजिक भिडियो सार्वजनिक याःगु खः ।
वरिष्ठ कलाकार मदनदास श्रेष्ठया प्रमुख आतिथ्यताय् जूगु ज्याझ्वलय् उगु म्युजिक भिडियो युट्युबपाखें सार्वजनिक याःगु खः । किपू नगरपालिका २ वडाया भुवन महर्जनं च्वयादीगु म्येँय् नांजाःम्ह संगीतकार सुरेन्द्र श्रेष्ठं लसय् हनादीगु खःसा थौंकन्हय् हङकङय् च्वँच्वनादीम्ह राजेन्द्र डंगोलं सः बियादीगु खः ।
करिब छगू दशक स्वयां न्ह्यः किपुलिइ भारि कुबीगु ज्या याना वयाच्वंम्ह विजय नांया मनूया जीवनया लिधंसाय् उगु म्युजिक भिडियो निर्माण याःगु खः । सुनाः नं बिउगु सितिं मकासे थम्हं यानागु ज्याया ज्याला जक कयाः जीवन हनावयाच्वंम्ह नापं म्हय् न्ह्याबलें नं झुलिझुलि वंगु वसः पुना जुइम्ह छम्ह शिक्षितम्ह भरियाया बारे उगु म्युजिक भिडियो निर्माण याःगु खः ।
किपूतय्सं ‘विजय’ नां बियातःम्ह उम्ह मनू गनं किपुलिइ वल व वयागु थाय्बाय् गन खः, गुकथं किपुलिइ थ्यन धइगु बारे सकलें अनभिज्ञ । अथेखःसां किपूमितय्सं बिउगु हे नामं म्हसिउम्ह छम्ह वास्तविक पात्रया बारे उगु म्युजिक भिडियो निर्माण याःगु खः । विजयया भूमिकाय् किपूया हे नांजाःम्ह कलाकार लक्ष्मीकुमार महर्जनं अभिनय यानादीगु दु ।
ज्याझ्वलय् किपू नगरपालिकाया निवर्तमान प्रमुख रमेश महर्जनं किपुलिइ थःगु जीवन पाना वंम्ह छम्ह भरियाया जीवनयात कयाः दयेकातःगु म्युजिक भिडियो व मूपात्रया अभिनय जीवन्त जूगु खँ कनादिल ।
वरिष्ठ कलाकारलिसें मूपाहां श्रेष्ठं नेपालभाषाय् नं बांबांलाःगु म्युजिक भिडियो निर्माण जूगु धासें सकलें कलाकारया अभिनय च्वछायेबहजू धयादिल । मगन इन्टरटेनमेन्टया अध्यक्ष लिसें निर्देशक रजिन महर्जनं म्युजिक भिडियो दयेकेगु विचाः गुकथं वल धइगु बारे कनादीगु खः ।
म्युजिक भिडियोय् देवेन्द्र महर्जन, बुद्धलक्ष्मी महर्जन, नरेन्द्र महर्जन, ज्ञानीशोभा महर्जन, धनबहादुुर महर्जन लगायतया कलाकारं अभिनय यानादीगु दु । म्युजिक भिडियोया निर्देशन विक्रम महर्जनं यानादीगु खःसा छायाँकन रजिन महर्जनं यानादीगु खः ।
LEAVE YOUR COMMENTS