ने. सं. ११४४ कौलाथ्व पारू - नःलास्वनेगु

बालेनया जय जयकार सुनियोजित धइगु पुष्टि

येँ (नेपालभाषा टाइम्स)- यँयाःबलय् कुमारीया रथ सालीकुन्हु बसन्तपुली येँ महानगरपालिकाया मेयर बालेन साहया जय जयकार यानाः नाराबाजी जुइगु वास्तवय् स्वतस्फुर्त मखुसें सुनियोजित ज्या खःधइगु पुष्टि जूगु दु । म्हिगः बसन्तपुली बालेन साहया किपा दुगु टीशर्त पुनाः छथ्वः मनूत चाःहिउ वःगु घटनां थ्व खँ पुष्टि जूगु खः । न्ह्यःने बालेनया किपा व लिउने अंग्रेजीं ‘बालेन’ धकाः आखः च्वयातःगु टीशर्ट पुनाः छथ्वः ल्याय्म्ह ल्यासेत हुल हे जुइक चाःहिउ वःगु खः ।

थगुने व नगुनेया यँयाःबलय् राष्ट्रपति, प्रधानमन्त्रीया न्ह्यःने हे भीडय् च्वनाः छथ्वः मनूतय्सं ‘बालेन ! बालेन !!’ धकाः नारा थ्वयेकूगु खःसा उकिया आलोचना नं जूगु खः । थुगुसी अज्याःगु अशोभनीय नारा थ्वयेकल धाःसा उमित ज्वनाः कारवाही यायेगु धकाः स्थानीयवासी व प्रहरी जानाः तयारी याःगु खः ।

तर थुगुसी बालेन साह थः हे जात्राय् उपस्थित जुइ मफइगु जूगुलिं नाराबाजी मजुइगु जुल । नाराबाजी याये म्वाःलीगु जुइवं वहे नाराबाजी याइपिनि पुचः म्हिगः बालेनया किपा दुगु टीशर्त पुनाः बसन्तपुर चाःहिउ वःगु खँ धाःगु दु । म्हिगः सुनियोजित रुपं हे टीशर्ट फिनाः चाःहिउ वःगु जुयाः थगुने व नगुने नं सुनियोजित रुपं हे ‘बालेन बालेन’ धकाः नाराबाजी याःगु पुष्टि जूगु खँ स्थानीयवासीतय्सं धाःगु दु ।

म्हिगः बालेनया टीशर्ट पुनाः ग्रुप हे दयेकाः चाःहिउ वःपिं थ्व मनूतय्त प्रहरीं ज्वनाः जनसेवा प्रहरी तयेयंकूगु खः ।

बालेनया किपा दुगु टिसर्ट फिनाः वयेवं स्थानीय वासिन्दां उकियात कयाः विरोध याःगु खः । वयां लिपा प्रहरी उमिगु सुरक्षाया नितिं धासें ज्वनाः जनसेवाः प्रहरी कार्यालय यंकूगु खँ येँया प्रहरी एसपी नवराज अधिकारी कनादीगु दु । एसपी अधिकारया कथं स्थानीय वासिन्दां जात्राय् भगवानया प्रचार प्रसार यायेगु खः धासें उकिया अःखः छुं नं कथंया गतिविधि मयाकेत इनाप यायेवं उमित ज्वनाः यंकूगु खः ।

थुगुसी यँयाःयात व्यवस्थित यायेगु लागिं उच्छृंखल जुयाः जात्राय् वइपिंत नं थाय्थासय् पनेगु ज्या जूगु खः । लिसें थुगुसी बाजं खलःतय्त नं लँय् च्वनाः उच्छृंखल पहलं बाजं थाये मदइगु, लाथेपाथे हाले मदइगु व बाजं खलकय् नं निश्चित जक मनू ज्वना वयेत निर्देशन बियातःगु खः ।