ने. सं. ११४४ कछलागा सप्तमी -

नीप्यक्वःगु विविध भाषा साहित्य सम्मेलन क्वचाल

थिमि(नेपालभाषा टाइम्स)- नीप्यक्वःगु विविध भाषा साहित्य सम्मेलन मध्यपुर थिमिया ताहाननि जुल । वंगु मंगलवाः जूगु सम्मेलनया उलेज्या नेपाल मजदुर किसान पार्टीया नायः नारायणमान बिजुक्छेँ रोहितं यानादगिु खः ।

ज्याझ्वलय् नवासें मूपाहां बिजुक्छें मंसिर ४ गते जुइगु निर्वाचनय् गठबन्धनयात त्याकल धाःसा देय्या अस्तित्व दइमखु धासें आः हे नं नेपाःया तराई क्षेत्रय् मनूत ५२ प्रतिशतं मल्याक दयेधुंकूगु व नागरिक ऐन लागू जुल धाःसा झीगु देय् नं दइमखु धयादिल ।

जातीय राज्यं देय्या भविष्य खतराय् लाइगु जक मखु थुकथंया राज्यं हिन्दू व मुस्लिमया थें युद्धया खतरां नं ब्वलनीगु दावी यानादिल।
ख्वप नगरपालिकाया प्रमुख सुनिल प्रजापतिं देय्या आपालं ऐतिहासिक लाय्कू व सम्पदा माओवादीं बम तयाः ध्वस्त याना बिउगु तर ख्वपया अज्याःगु सम्पदा संरक्षण यानातःगुलिं हे ख्वपय् आन्तरिक व बाह्य पर्यटकत अप्वया वनाच्वंगु खः धयादिल ।

ख्वप मा.वि.या प्राचार्य प्रकाश धौबजिं ख्वप नगरपालिकां संचालन यानाच्वंगु शैक्षिक संस्थाय् सर्वसाधारण जनतां म्हो शुल्कय् गुणस्तरीय उच्च शिक्षा हासिल याये खनाच्वंगु दु धयादिल ।

मध्यपुर थिमि नगरपालिका ८ वडाअध्यक्ष रमेश थापा श्रेष्ठं विविध भाषा साहित्य सम्मेलनया इतिहास बारे जानकारी बियादिसें थिमिया महालक्ष्मीस्थानय् मानव अंग प्रत्यारोपण अस्पताल निर्माणया निंतिं जग्गा उपलब्ध याकेत सिफारिस छ्वयेधुंगु जानकारी बियादिल ।

शिक्षासेवी लिसें समाजसेवी कृष्णबहादुर प्रजापतिया सभापतित्वय् जूगु ज्याझ्वलय् जिल्ला बचत तथा ऋण सहकारी संघया कृष्णगोविन्द लाखे, डा. रविन्द्रभक्त प्रधानाड्डं नं नुगःखँ तयादीगु खः । ज्याझ्वलय् मूपाहां बिजुक्छें वाद्य गुरु श्रीगोपाल प्रजापति, ज्येष्ठ नागरिक हिराकाजी प्रजापति, मानन्धर गुंला बाजं, मध्यपुर गुंला बाजं, थिमि गुंला बाजं, बोडे नीलबाराही गंप्याखं, बोडे जात्राय् म्ये प्वाः खनादीम्ह बुद्धकृष्ण बाग श्रेष्ठयात हनेज्या नं यानादीगु खः ।