अख्तियार आयुक्तया पःखाः थुनेवं चिरिबाबुयात बयान
यल (नेपालभाषा टाइम्स)÷यल महानगरपालिकाया मेयर चिरिबाबु महर्जनयात अख्तियार दुरुपयोग अनुसन्धान आयोगं बयान बिउ वा धकाः पूर्जी छ्वया हःगु दु । वंगु बुधवाः तिनि वडा १० या चाकुपाटस्थित अख्तियार दुरुपयोग अनुसन्धान आयोगया आयुक्त डा. सुमित्रा अमात्यया छेँया पःखाः यल मनपां थुना बिउगु खः ।
म्हिगः अख्तियारया कर्मचारीत वय्कःया ज्याकुथिइ हे वयाः निगू अलग अलग उजुरीया नितिं बयान बिउ वा धकाः पौ त्वःतूगु खः । उकी मध्ये छगू पतिइ च्वयातःगु दु, ‘धापाखेलया चलखय् लानाः पीडित जूपिंत आर्थिक ग्वाहालि इना बिउगु बारे छिलिसे छुं खँ न्यनेमाःगु जुयाः उपस्थित जुयाः अनुसन्धानय् ग्वाहालि यानादिसँ ।’ उकथं हे मेगु पतिइ च्वयातःगु दु, ‘प्रेस संयोजक नियुक्तिया विषयय् न्यनेकने यायेमाःगु जुयाः झायाः ग्वाहालि यानादिसँ ।’
मेयर महर्जनं धाःसा अख्तियारं वःगु पौ सामान्य खः धासें थुकियात कयाः चिन्ता कायेम्वाःगु प्रतिक्रिया ‘नेपालभाषा टाइम्स’ यात बियादीगु दु । थ्व पःखाः तछ्याःगुया ब्वलसायेत जकं पौ वःगु मखुला धइगु न्ह्यसःया लिसलय् वय्कलं धयादिल, ‘भचा भचा खः, भचा भचा मखु । सम्पदा क्षेत्र ल्यंकेगु दायित्व नगरपालिकाया खः, सम्पदा ल्यंकेगु ज्याय् थज्याःगु किचःत वयाच्वनी ।’
वय्कलं स्वदँ न्ह्यःया घटनायात कयाः आः पौ च्वःगु धासें थुकिया खास हे अर्थ मदुगु दावी यानादिल । २०७८ साल असारय् खुसिबालं पीडित जूपिंत राहत कथं नगरपालिकां ग्वाहालि याःगु खःसा उकिया बेनामी उजुरी लाःगु खः । तर थौं स्वदँ लिपा थःत पौ वगुलिं थः अजू चायागु खँ वय्कलं कनादिल ।
स्थानीय जनता व सम्बन्धित गुथियारं बिउगु उजुरीया आधारय् पःखाः थुनागु खँ कँसें वय्कलं सम्पदा क्षेत्र ल्यंकेगु दायित्व थम्हं पूवंकागु दावी नं यानादिल । आः सप्तपाताल पुखू दयेकेगु ज्याय् नं देगःयात मछिंक गेट तये हःगुलिं पःखाः थुनेमाःगु खँ वय्कलं कनादिल ।
LEAVE YOUR COMMENTS