ने. सं. ११४४ कौलाथ्व पारू - नःलास्वनेगु

समाजवादी तापायेवं राजपायात उपसभामुख बीगु सम्भावना

येँ – सरकारय् दुपिं निम्ह मन्त्रीतय् राजीनामा लिपा समाजवादी पार्टीं सरकारयात बियातःगु समर्थन नं लित काःगु दुसा आः सत्तारुढ दल नेकपा व मेगु मधेसवादी पार्टीं राजपाया स्वापू गुकथं विकसित जू वनी धइगु चिउताः राजनीतिक ख्यलय् खने दया वःगु दु । संघीय सरकारय् समाजवादी पार्टी व नेकपाया स्वापू त्वाःदलेवं आः प्रदेश नम्बर २ या सत्ता समीकरणय् नं हिउपाः वइगु संकेत समेत खने दया वःगु खँ धयाहःगु दु ।

प्रदेश २ लय् समाजवादी पार्टी व राजपाया मंकाः सरकार दु । आःया घटना लिपा आः प्रदेश २ लय् नं नेकपां समाजवादीयात सरकारं चीकेगु लागिं राजपालिसे गठबन्धन दयेकफुगु अनुमान याना हःगु दु । राजपाया केन्द्रीय नेता मनिष सुमनं आः प्रदेश २ या सत्ता समीकरण हिले फइगु खँ सम्भावना प्वंकादीगु दु । तर थुकिया लागिं आः न्ह्यःने वयाच्वंगु छगू निगू राजनीतिक घटनां निर्धारण याइगु खँ नं वय्कलं कनादिल ।

आः राष्ट्रियसभाया चुनाव जुइत्यंगु दुसा उगु चुनावय् प्रदेश २ पाखें जुइगु निर्वाचनय् नेकपा व राजपा मिले जुयाः वनेगु निर्णय जुइधुंकूगु दु । थ्वया लिपा आः पुस १४ गते सभामुख ल्ययेगु चुनाव नं जुइत्यंगु दु । उकी राजपायात उपसभामुख बीगु खँ न्ह्यःने वयाच्वंगु दु । सभामुखय् नेकपाया सुवास नेम्बाङ हे वइगु सम्भावना दु । यदि उपसभामुख राजपायात बिल धाःसा प्रदेश २ या सत्ता समीकरण हिलीगु संकेत अनं हे प्राप्त जुइगु खँ धाःगु दु ।

समाजवादी पार्टीं संघीय सरकार–यात बियातःगु समर्थन लित काःगुयात राजपां लसकुस याःगु दु । तर समाजवादी पार्टीया अध्यक्ष उपेन्द्र यादवं धाःसा नेकपालिसे सहकार्य यानाः न्ह्याः वन धाःसा थ्व राजपाया लागिं घातक जुइ फइगु ख्याच्वः बियादीगु दु । राजपां अज्याःगु ज्या याइ धकाः थम्हं मती मतयागु खँ वय्कलं धयादीगु दु ।

समाजवादी–राजपा स्वापू खलबल

सत्तारुढ दल नेकपां म्हितूगु राजनीतिक चालया कारणं मधेसया मुद्दाय् केन्द्रित निगू प्रमुख दल समाजवादी पार्टी व राष्ट्रिय जनता पार्टी दथुया स्वापू समेत खलबल जूगु दु । समाजवादी पार्टी व राजपा याकनं हे एकीकरण जुइगु धकाः तकं खँ जुयाच्वंगु खः । तर नेकपां समाजवादीयात वांछ्वयाः राजपायात ज्वंगु कारणं यानाः आः समाजवादी व राजपाया स्वापू समेत खलबल जूवंगु खः । आः वइगु इलय् थ्व स्वापू अझ हे स्यने फुगु खँ राजनीतिक विश्लेषकतय्सं धया हःगु दु । समाजवादी व राजपाया स्वापू स्यन धाःसा मधेसया मुद्दा समेत कमजोर जुइ फइगु खँ समेत धयाहःगु दु ।