‘भारतं लिहां वयेवं दाहालं एमालेयात वांछ्वयेत्यंगु खः’

येँ (नेपालभाषा टाइम्स)-भारतय् प्रधानमन्त्री नरेन्द्र मोदीया सपथ ग्रहण ज्याझ्वलय् ब्वति कयाः लिहां वयेवं हे प्रधानमन्त्री पुष्पकमल दाहालं एमालेयात वांछ्वयाः कांग्रेसलिसे सत्ता समीकरण यायेगु धकाः तयारी याःगु कारणं थःपिंसं माओवादीया साथ त्वःताः न्हूगु समीकरण दयेकेमाःगु खँ एमाले अध्यक्ष केपी ओलीं कनादीगु दु । म्हिगः पार्टीया सचिवालय बैठकय् न्हूगु गठबन्धन छाय् दयेकेमाल धइगु खँय् पार्टीयात ब्रिफिङ यायेगु झ्वलय् वय्कलं थ्व खँ कनादीगु खः ।

माओवादीलिसेया गठबन्धन याउँक न्ह्यायेमा धकाः थःपिंसं छुं नं कथंया शर्त मतयागु व मन्त्रालयया वरियताय् तकं छुं न्वमवानागु लिसें सरकारयात छुं हे पंगः मथँसे प्यला तक न्ह्याके बियागु खःसां माओवादीं विश्वासघात याःगु कारणं न्हूगु समीकरण दयेकेमाःगु खँ नं अध्यक्ष ओलीं कनादिल ।

प्रधानमन्त्री दाहाल भारतं लिहां वयेवं आकाझाकां राष्ट्रिय सहमतिया चर्चा न्ह्याकूगु व थुकिया नितिं न्हापां कांग्रेसलिसे खँ ल्हाःगु तर कांग्रेसं दाहालया खँयात विश्वास मयाःगु जक मखु उकिया सूचना तकं थःत बिउगु खँ नं ओलीं कनादिल । थुकथं प्रधानमन्त्रीं हे सरकारया विकल्प मालेगु ज्या याःगुलिं राष्ट्रिय राजनीति मेगु दिशाय् वंगु दावी नं ओलीं यानादिल ।

मेखे प्रधानमन्त्री दाहालं धाःसा एमाले अध्यक्ष ओलीं जालझेल यानाः सत्ता समीकरण त्वाःथःगु द्वपं बियादीगु दु । म्हिगः थःगु पार्टीया बैठकय् न्ववासें प्रम दाहालं थ्व द्वपं बियादीगु खः । वय्कलं धयादिल, ‘ओली व कांग्रेस दथुइ सहमति जुइगु चर्चा जुइवं जिं ओलीयात नापलाः प्रधानमन्त्री जुइगु खःसा जिं राजीनामा बी धयागु खः । ओलीं सरकार बल्लाकेगु, राजनीतिक नियुक्ति बारे टिओआर दयेकेगु खँ ल्हासें गठबन्धन हिलेगु मखु धकाः भ्रमपूर्ण रुपं जितः आश्वस्त याःगु खः ।’

प्रम दाहालं थःपिंसं वाम एकताया लागिं नं एमालेलिसे गठबन्धन यानागु खः धासें ओलीं षडयन्त्र याःगुलिं तत्कालया निंतिं थःपिंत नोक्सान जूसां थुकिं दीर्घकालीन नोक्सानी धाःसा एमालेयात हे जुइगु दावी नं यानादिल ।

थ्वहे झ्वलय् प्रम दाहालं कन्हय् संसदय् विश्वासया मत काइगु जूगु दु । थःपिं सरकारय् मदयेधुंकाः न्हूगु सरकार संविधानया छु धारा अन्तर्गत गठन याइ धइगु खँ राष्ट्रपति रामचन्द्र पौडेलया विवेकय् निर्भर जुइगु खँ नं प्रम दाहालं कनादीगु दु । दाहालं राजीनामा बीधुंकाः गठन जुइगु न्हूगु सरकार संविधानया धारा ७६ (२) कथं वइ कि ७६ (३) कथं वइ धइगु खँय् राजनीतिक व कानुनी ख्यलय् समेत चर्चा जुयाच्वंगु दु ।