हाकनं सेवा यायेगु मौका बी धयागु विश्वास दु

चुनावय् छिगु मुख्य एजेन्डा छु खः ?
जिगु मुख्य एजेन्डा धइगु हे प्रतिगमन विरुद्ध खः । प्रतिगमनयात परास्त यानाः समाजय् ब्वलना वयाच्वंगु सामाजिक विकृति, विसंगति न्हंकाः छ्वयेगु खः । वडा दुने सेवाग्राहीयात सरल, सहज व सेवामैत्री भावं सेवा उपलब्ध याकेगु, विकास निर्माणया ज्याय् पारदर्शी कायम व सुुशासनया व्यवस्था यायेगु जुइ । वडां बीगु सेवाय् ढिलासुस्ती मयासे फक्व याकनं सेवा उपलब्ध याकेगु जुइ ।

छिगु वडाय् दुगु मुख्य समस्या छु ?
येँ महानगरया २५ वडा धइगु येँ देय्या ‘कोर एरिया’या दुने लाःगु वडामध्ये छगू खः । उकिसनं ख्वातुगु वस्ती दुगु वडा । वडाया मुख्य समस्या धइगु लःया व्यवस्थापन, धः निकास नापं न्हिथं जुयाच्वनीगु ट्राफिक व्यवस्थापन हे मुख्य समस्या खः । मुख्य रुपं थुपिं समस्या समाधान यायेमाःगु मुख्य चुनौतिया रुपय् दु । थुकिया निंतिं फक्व पहल याना वनेगु जुइ ।

निर्वाचित जुयादी धइगु आधार छु दु ?
जि छम्ह न्हापांनिसें हे सामाजिक सेवाय् क्रियाशीलम्ह खः । जि पूर्व वडाअध्यक्ष जुयाः जनतानाप प्रत्यक्ष भ्यलय् पुनाः ज्या यायेधुंम्ह अर्थान वडावासीया सेवा यायेधुंम्ह व्यक्ति खः । अथे जूगुलिं जितः वडाया सकसिनं धइथें बांलाक म्हसिउ । जिं न्हापा वडाया नेतृत्व यानाः गुगु सेवा बियागु खः, थुपिं हे थीथी आधारय् जि हाकनं निर्वाचित जुइगु आधार खःसा जितः विश्वास दु वडावासी हाकनं सेवा यायेगु मौका बी ।

निर्वाचित जुया वयेधुंकाः न्हापां छु यानादी ?
निर्वाचित जुया वयेधुंकाः दकलय् न्हापां वडावासीया समस्या पहिचान यानाः समाधानया निंतिं न्ह्याः वनेगु जुइ । न्हापा हे योजना दयेकाः व याये थ्व याये धायेबलय् लिपा परिस्थितिं साथ मबीफु । उकिं समस्याया पहिचान यानाः आवश्यकताया लिधंसाय् प्राथमिकता बियाः कार्यान्वयन याना वनेगु जुइ । अय्नं छुं छुं योजना आः हे नं दयेकागु दु । उकियात नं सरोकारवालातलिसे सहलह यानाः प्राथमिकता बियाः कार्यान्वयनय् वनेगु जुइ ।

भाषा, कला, संस्कृतिया निंतिं छु योजना दु ?
येँ देय् स्वयं हे छगू भाषा, कला, संस्कृृति, सम्पदा व सभ्यतां जाःगु सहर खः । थुकिया रक्षा यानाः प्रवद्र्धन, संवद्र्धन व संरक्षण यायेगु झी सकसिगुं कर्तव्य खः । अले जिं न्हाचः नं धाये धुन २५ वडा धइगु कोर एरियाय् लाःगु वडा खः । थन आपालं नेवाःत च्वनाच्वंगु दु । नेवाःतय् ख्वातुगु वस्ती दुगु वडा खः । उकिं भाषा, कला, संस्कृति, सम्पदालिसें झीगु पहिचानलिसे स्वानाच्वंगु गुलि नं विषय दु उकियात ल्यंका तयेगु निंतिं जिं थःगु थासं फक्व कुतः याना वनेगु जुइ ।

सम्बन्धित बुखँ

LEAVE YOUR COMMENTS