मापदण्ड पीडितया मसाल जुलुस
येँ (नेपालभाषा टाइम्स)- स्वनिगःया बागमति, बिष्णुमति व मनोहरा खुसि सिथय् ४० मिटर लागा तक छुं हे कथंया संरचना दयेके दइ मखु धकाः सर्वोच्च अदालतं याःगु पैmसला विरुद्ध म्हिगः यलया कोपुण्डोल लागाय् प्रदर्शन जुल ।
कोपुण्डोलया बागमती ताँ क्वय् मुनाः उगु प्रदर्शन याःगु खः । अनंनिसें नारा थ्वयेकाः न्ह्याःगु उगु प्रदर्शन थापाथलीया ताँ क्वय् थ्यंकाः सभाय् हिउगु खः । लिसें अन थ्यंकाः प्रदर्शनकारीतय्सं आकाझाकां मसाल च्याकाः मसाल जुलुस नं पिकाःगु खः । मसाल जुलुसय् प्रहरीं हस्पक्षेप यानाः मसाल लाका यंकूगु खः । तर प्रदर्शनीतय्सं हानं मेगु मसाल हयाः च्याकुसें जुलुस पिकाःगु खः ।
प्रहरीं हस्तक्षेप यायेवं प्रदर्शनकारीतय्सं अन हे च्वनाः ‘प्रहरी दमन मुर्दावाद’, ‘खुसिया मापदण्ड खारेज या’, ‘नागरिक एकता जिन्दावाद’ धकाः नारा थ्वयेकूगु खः ।
उपत्यकाव्यापी सडक विस्तार पीडित संघर्ष समिति व खोला किनार मापदण्ड पीडित संघर्ष समितिया मंकाः ग्वसालय् उगु प्रदर्शन जूगु खः । उकी मापदण्डपाखें पीडित जुइपिं थीथी खुसि सिथय् च्वंपिं स्थानीय पीडिततय्सं नं थःथःगु ब्यानर ज्वनाः ब्वति काः वःगु खः ।
प्रदर्शनय् थुगु मापदण्ड विरुद्ध संघर्ष यायेत गठित समितिया संयोजक सुमन साय्मि लिसें नेवाः अभियन्तापिं रविन्द्र कुमार श्रेष्ठ, राजाराम तण्डुकार आदि नापं येँ, यल, गोकर्ण, तोखा लागाया स्थानीय पीडिततय्सं ब्वति कया वःगु खः ।
LEAVE YOUR COMMENTS